بھارتی فلم انڈسٹری کے معروف اداکار گووندا کی بیوی سنیتا آہوجا نے بالآخر طلاق کی افواہوں پر خاموشی توڑ دی۔
سنیتا آہوجا نے اپنے تازہ ویڈیو بیان میں طلاق سے متعلق خبروں کو مسترد کرتے ہوئے کہا کہ یہ سب صرف افواہیں ہیں۔ انہوں نے واضح کیا کہ “دنیا میں ایسا کوئی بھی مائی کا لال نہیں ہے جو مجھے اور گووندا کو جدا کر سکے۔ کوئی ہے تو سامنے آکر دکھائے۔”
سنیتا آہوجا نے ایک بار پھر یہ تصدیق کی کہ وہ اور گووندا علیحدہ رہ رہے ہیں، لیکن اس کی وجہ بتاتے ہوئے کہا کہ الگ الگ رہنے کا مطلب یہ نہیں کہ وہ علیحدہ ہوگئے تھے۔ انہوں نے وضاحت کی کہ جب گووندا نے سیاست میں قدم رکھا تھا، تب ان کی بیٹی بڑی ہو رہی تھی اور ہر وقت پارٹی کے رہنما اور کارکنان گھر میں جمع رہتے تھے۔
سنیتا نے بتایا کہ گووندا کو اپنی سیاسی مصروفیات کے لیے رات گئے تک میٹنگز کرنی پڑتی تھیں، اور اس وجہ سے وہ اکثر گھر میں نہیں ہوتے تھے۔ اس لیے انھوں نے اپنے گھر کے سامنے ایک اور بنگلہ لے لیا تھا جو اب ان کا دفتر بن چکا ہے۔
سنیتا نے مزید کہا کہ گووندا کو زیادہ باتیں کرنے اور محافل جمائے رکھنے کی عادت ہے، اس لیے وہ ہمیشہ گھر میں سب کو جمع کرتے ہیں، جبکہ وہ خود زیادہ باتیں کرنے کو توانائی کا ضیاع سمجھتی ہیں اور ایسی محافل سے دور رہتی ہیں۔
سنیتا آہوجا نے کہا کہ جب سے دفتر اور گھر علیحدہ ہوئے ہیں، وہ اور ان کی بیٹی آزادانہ طور پر اپنے مرضی کے کپڑے پہن کر گھر میں گھومتی ہیں۔ انہوں نے یہ بھی کہا کہ “بس اتنی سی بات ہے کہ ہم الگ الگ گھر میں ہیں، لیکن لوگوں نے اس کو رائی کا پہاڑ بنا دیا۔”
یاد رہے کہ گووندا اور سنیتا آہوجا نے مارچ 1987 میں خفیہ شادی کی تھی، اور 1988 میں اپنی بیٹی کی پیدائش کے بعد اپنی شادی کو منظرعام پر لایا تھا۔
