پشاور۔خیبر پختونخوا حکومت نے وفاق سے مطالبہ کیا ہے کہ افغانستان سے مذاکرات کے لیے مجوزہ ٹرمز آف ریفرنس (ٹی او آرز) کی فوری منظوری دی جائے۔ مشیر اطلاعات خیبر پختونخوا، بیرسٹر محمد علی سیف نے کہا ہے کہ وفاقی حکومت ٹی او آرز کی منظوری میں مزید تاخیر نہ کرے تاکہ صوبائی حکومت دہشت گردی کے مسئلے پر بروقت اقدامات کر سکے۔
بیرسٹر سیف کے مطابق، خیبر پختونخوا حکومت ہنگامی بنیادوں پر ایک وفد افغانستان بھیجنے کی خواہش رکھتی ہے تاکہ خطے میں بڑھتی ہوئی دہشت گردی کا مؤثر حل نکالا جا سکے۔ ان کا کہنا تھا کہ عوام کے جان و مال کا تحفظ صوبائی حکومت کی اولین ترجیح اور ذمہ داری ہے۔
انہوں نے وفاقی حکومت کو تنقید کا نشانہ بناتے ہوئے کہا کہ خیبر پختونخوا میں دہشت گردی کے مسئلے کو نظر انداز کیا جا رہا ہے، جبکہ دیگر صوبوں کے وزرائے اعلیٰ کے غیر ملکی دوروں پر اعتراض نہیں اٹھایا جاتا۔
بیرسٹر سیف نے کہا کہ اگر مریم نواز بھارت سے اسموگ ڈپلومیسی کر سکتی ہیں تو خیبر پختونخوا حکومت کو بھی دہشت گردی جیسے سنگین مسئلے پر افغانستان سے مذاکرات کا موقع ملنا چاہیے۔
ان کا مزید کہنا تھا کہ وفاقی حکومت کی دوہری پالیسی سے خیبر پختونخوا میں احساس محرومی میں اضافہ ہو رہا ہے، جو ملک کے وسیع تر مفاد میں نہیں۔ انہوں نے وفاق پر زور دیا کہ سیاست سے بالاتر ہو کر صوبے میں دہشت گردی کے خاتمے کے لیے عملی اقدامات کیے جائیں۔
