امریکی ریاستوں شمالی اور جنوبی کیرولائنا کے جنگلات میں گزشتہ ایک ہفتے سے آگ بھڑک رہی ہے، جو مختلف علاقوں تک پھیل چکی ہے۔
امریکی میڈیا کے مطابق خشک موسم، تیز ہوائیں اور غیر معمولی درجہ حرارت کے باعث آگ کی شدت میں مسلسل اضافہ ہو رہا ہے، جس سے رہائشی علاقوں کو بھی خطرہ لاحق ہے۔
امریکا کی قومی موسمیاتی سروس نے متاثرہ علاقوں میں بسنے والے ہزاروں شہریوں کو فوری طور پر محفوظ مقامات پر منتقل ہونے کی ہدایت دی ہے۔
تاحال کسی جانی نقصان کی اطلاع نہیں ملی، جبکہ فائر فائٹرز آگ پر قابو پانے کے لیے پانی کے چھڑکاؤ اور بیک برننگ آپریشنز میں مصروف ہیں۔ حکام نے شہریوں کو دھوئیں سے بچنے کے لیے احتیاطی تدابیر اپنانے کا مشورہ دیا ہے۔
جنوبی کیرولائنا کے گورنر ہنری میک ماسٹر نے ریاست میں ایمرجنسی نافذ کرتے ہوئے تمام جنگلاتی علاقوں میں آگ جلانے پر مکمل پابندی عائد کر دی ہے۔ گورنر کا کہنا تھا کہ یہ پابندی تاحکم ثانی برقرار رہے گی۔
تاحال آگ سے ہونے والے مکمل نقصانات کی تفصیلات سامنے نہیں آئیں، تاہم حکام نے شہریوں کو مزید احتیاط برتنے کی تاکید کی ہے۔
