واشنگٹن۔امریکا نے کابل ایئرپورٹ دھماکے میں ملوث داعش کے دہشت گرد شریف اللہ کی گرفتاری میں پاکستان کے تعاون پر شکریہ ادا کیا ہے۔
غیر ملکی میڈیا کے مطابق، امریکی محکمہ خارجہ کی ترجمان ٹیمی گروس نے میڈیا بریفنگ کے دوران صحافیوں کو بتایا کہ شریف اللہ کی گرفتاری کا کریڈٹ پاکستان کو جاتا ہے۔
انہوں نے کہا کہ شریف اللہ کی گرفتاری اس بات کا ثبوت ہے کہ پاکستان اور امریکا دہشت گردی کے خلاف متحد ہیں اور دونوں ممالک کے تعلقات بھی اہم ہیں۔
ٹیمی گروس نے مزید کہا کہ دہشت گردی کے خلاف جنگ میں پاکستان امریکا کا اتحادی ہے، اور یہ دونوں ممالک کے مشترکہ مفاد میں ہے۔
یاد رہے کہ گزشتہ روز امریکی قومی سلامتی کے مشیر مائیکل والٹر نے بھی داعش کے دہشت گرد شریف اللہ کی گرفتاری میں پاکستان کے تعاون کو سراہا تھا۔
