اسلام آباد: پاسپورٹ ہیڈ کوارٹرز میں جدید ٹیکنالوجی سے لیس نئے پرنٹرز نصب کر دیے گئے ہیں، جنہیں جرمنی سے درآمد کیا گیا ہے۔ ان پرنٹرز میں دو ای پرنٹرز اور چھ ڈیسک ٹاپ پرنٹرز شامل ہیں۔
ڈائریکٹر جنرل پاسپورٹس مصطفیٰ جمال قاضی نے ای پرنٹرز سیکشن کا دورہ کیا اور پرنٹرز کی انسٹالیشن کے عمل پر بریفنگ لی۔ اس عمل کے لیے ایک غیر ملکی تکنیکی ٹیم بھی پاکستان پہنچی ہے، جو جلد ہی انسٹالیشن مکمل کرے گی۔
ڈی جی پاسپورٹس کے مطابق، یہ جدید پرنٹرز ایک گھنٹے میں ایک ہزار پاسپورٹس پرنٹ کرنے کی صلاحیت رکھتے ہیں، جس سے پرنٹنگ کے معیار میں بھی نمایاں بہتری آئے گی۔
مصطفیٰ جمال قاضی نے یہ بھی بتایا کہ آئندہ ماہ مزید ای پرنٹرز پاکستان لائے جائیں گے، جس سے پاسپورٹ پرنٹنگ کا عمل مزید تیز اور مؤثر ہو جائے گا۔
