بھارتی اداکارہ راکھی ساونت نے پاکستانی اداکارہ ہانیہ عامر اور بالی ووڈ کے معروف سپر اسٹار سلمان خان کے درمیان رشتہ جوڑنے کی دلچسپ تجویز پیش کی ہے۔
یہ تجویز اس وقت سامنے آئی جب ہانیہ عامر کو برطانوی پارلیمنٹ کی جانب سے انٹرٹینمنٹ انڈسٹری میں ان کی خدمات کے اعتراف میں “ریکگنیشن ایوارڈ” سے نوازا گیا۔
سوشل میڈیا پر وائرل ہونے والی ایک ویڈیو میں ہانیہ عامر نے راکھی ساونت کی معصومانہ اور تفریحی باتوں کو سراہا۔ اس پر ردعمل دیتے ہوئے راکھی ساونت نے کمنٹس میں کہا، “مجھے ہانیہ بہت پسند ہے۔ میں چاہتی ہوں کہ وہ میرے بھائی سلمان خان سے شادی کر لے۔” انہوں نے مزید کہا کہ ہانیہ نہ صرف بہت خوبصورت ہیں بلکہ ایک باصلاحیت اداکارہ بھی ہیں جو عالمی سطح پر مقبول ہیں۔
راکھی ساونت کے اس تبصرے پر سوشل میڈیا پر ملا جلا ردعمل آیا۔ بعض صارفین نے اس کو مزاحیہ قرار دیا جبکہ کچھ نے سلمان خان اور ہانیہ عامر کے درمیان عمر کے فرق پر سوالات اٹھائے۔
ایک صارف نے لکھا، “اگر ہانیہ پاکستانی حسینہ اور گڑیا ہیں تو وہ کسی بڑی عمر کے شخص سے کیوں شادی کرے گی؟” جبکہ دوسرے نے کہا، “راکھی جی، آپ ہماری لڑکی کو اپنے بھائی کے لیے کیوں تجویز کر رہی ہیں؟”
یہ پہلی مرتبہ نہیں ہے کہ راکھی ساونت نے سلمان خان کے حوالے سے کوئی تجویز دی ہو۔ اس سے قبل بھی وہ کہہ چکی ہیں کہ سلمان خان کو نئی اور باصلاحیت اداکاراؤں کے ساتھ کام کرنا چاہیے، نہ کہ ان ہیروئنز کے ساتھ جو ان کی حالیہ فلموں میں بار بار نظر آتی ہیں۔
