مشہور فلمساز جیمز کیمرون کی کامیاب سیریز “اوتار” کی تیسری قسط ’’اوتار: فائر اینڈ ایش‘‘ کا پہلا ٹریلر ’’سینماکون‘‘ میں جاری کیا گیا، جہاں سینما مالکان کی بڑی تعداد موجود تھی۔
غیر ملکی میڈیا رپورٹس کے مطابق، اس فلم کی ایک خاص بات یہ ہے کہ اسے دیگر سیکوئلز کی طرح تاخیر کا سامنا نہیں ہوا، کیونکہ کیمرون نے اس کو دیگر فلموں کے ساتھ بیک وقت شوٹ کیا تھا اور جلد ریلیز کرنے کا وعدہ کیا تھا۔
پہلے ٹریلر میں نئے ناوی قبائل کا تعارف کرایا گیا ہے، جن میں ’ونڈ ٹریڈرز‘ (وہ پرامن قبیلہ جو فضا میں غبارے جیسے جہازوں پر سفر کرتا ہے) اور ’فائر پیپل‘ شامل ہیں۔ ٹریلر کا آغاز ایک فضائی جنگ سے ہوتا ہے، جس میں ایک آگ سے لپٹا ہوا تیر ایک ناوی کو ہلاک کر دیتا ہے۔
فلم کی کہانی دوسری قسط ’’دی وے آف واٹر‘‘ کے بعد شروع ہوتی ہے۔ زوئی سالڈانا نے ٹریلر کے دوران بتایا کہ ’فائر پیپل‘ وہ ناوی ہیں جنہوں نے ایوا کو چھوڑ دیا تھا۔
کیمرون نے ویڈیو لنک کے ذریعے ٹریلر کی نمائش میں شرکت کی اور بتایا کہ وہ نیوزی لینڈ میں فلم کی تکمیل کے آخری مراحل میں ہیں۔ فلم 19 دسمبر 2025 کو ریلیز ہوگی، اور توقع کی جارہی ہے کہ یہ پہلی دونوں فلموں سے زیادہ کمائی کرے گی۔
