نئی دہلی ۔بھارتی فلم انڈسٹری کے معروف اداکار، جنہیں “مسٹر پرفیکشنسٹ” کے لقب سے جانا جاتا ہے، عامر خان اپنی گرل فرینڈ گوری سپراٹ کے ساتھ پہلی بار کسی عوامی تقریب میں ایک ساتھ شریک ہوئے۔
بھارتی میڈیا رپورٹس کے مطابق، عامر خان اور گوری سپراٹ حال ہی میں چین میں منعقد ہونے والے مکاؤ انٹرنیشنل کامیڈی فیسٹیول میں ایک ساتھ شرکت کرتے ہوئے دیکھے گئے، جہاں دونوں ہاتھوں میں ہاتھ ڈالے محفل میں داخل ہوئے، جس کے بعد یہ جوڑا خبروں کی سرخیوں میں آ گیا۔
ایونٹ کے موقع پر عامر اور گوری نے روایتی لباس زیب تن کیے۔ عامر خان نے سیاہ کرتا پاجامہ اور شال پہنی، جبکہ گوری سپراٹ سفید ساڑھی میں نہایت خوبصورت نظر آئیں۔
اس موقع پر دونوں نے چینی میڈیا کے لیے مشترکہ فوٹو شوٹ بھی کرایا۔ تقریب میں موجود مشہور چینی اداکار شین ٹینگ اور ما لی سے عامر خان نے گوری کا تعارف بھی کروایا۔
یاد رہے کہ عامر خان نے اپنی 60ویں سالگرہ کے موقع پر، جو کہ 14 مارچ 2025 کو منائی گئی، گوری سپراٹ کے ساتھ اپنے رشتے کی باضابطہ تصدیق کی تھی۔ ان کا کہنا تھا کہ وہ دونوں گزشتہ ایک سال سے ایک ساتھ زندگی گزار رہے ہیں۔
