لاہور۔وزیراعلیٰ پنجاب مریم نواز شریف نے کہا ہے کہ پنجاب سیاحوں کو خوش آمدید کہنے کے لیے مکمل تیار ہے، اور اکنامک کوآپریشن آرگنائزیشن (ای سی او) کے معزز مہمانوں کی موجودگی ہمارے لیے اعزاز کی بات ہے۔
وزیراعلیٰ سے ای سی او کے 25 رکنی اعلیٰ سطحی وفد نے ملاقات کی، جس کی قیادت تنظیم کے سیکرٹری جنرل اسد مجید خان نے کی۔ وفد میں ترکیہ، ایران، ازبکستان، تاجکستان اور پاکستان میں ای سی او کے مستقل مندوبین شامل تھے۔
مریم نواز شریف نے لاہور آمد پر وفد کو گرمجوشی سے خوش آمدید کہا۔ اس موقع پر سینئر وزیر مریم اورنگزیب نے وفد کو بریفنگ دی، جبکہ وزیراعلیٰ نے لاہور کو ای سی او کیپٹل قرار دینے میں تعاون پر ترکمانستان کا شکریہ ادا کیا۔
لاہور، ثقافت، محبت اور تاریخ کا شہر
وزیراعلیٰ نے کہا کہ ای سی او کے نمائندگان کی لاہور میں موجودگی باعث فخر ہے۔ انہوں نے لاہور کو ثقافت، تاریخ اور محبت کا امین قرار دیا، اور کہا کہ سابق وزیراعظم نواز شریف خود لاہور کی ثقافتی ورثے کی بحالی میں ذاتی دلچسپی لے رہے ہیں۔
انہوں نے کہا کہ لاہور محض ایک شہر نہیں بلکہ جیتی جاگتی تاریخ ہے۔ یہاں کی گلیوں میں تہذیب کی خوشبو رچی بسی ہے، اور اس کے تاریخی مقامات ماضی کی شان کے گواہ ہیں۔ لاہوریوں کی مہمان نوازی اپنی مثال آپ ہے۔
پنجاب، سیاحت اور سرمایہ کاری کا نیا مرکز
مریم نواز کا کہنا تھا کہ لاہور کے شاہی قلعے، باغات اور یونیسکو کے عالمی ثقافتی ورثے کی فہرست میں شامل مقامات، اس شہر کی عظمت کو ظاہر کرتے ہیں۔ لاہور نہ صرف تاریخی ورثے کا محافظ ہے بلکہ کھانوں اور ذائقوں کا گڑھ بھی ہے۔
انہوں نے کہا کہ پنجاب حکومت صوبے بھر میں سیاحتی مقامات کی بہتری پر کام کر رہی ہے، تاکہ مقامی اور غیر ملکی سیاحوں کو بہترین سہولیات فراہم کی جا سکیں۔ حکومت سیاحت کو ایک مکمل انڈسٹری کے طور پر فروغ دینے کے لیے پُرعزم ہے۔
مزید کہا کہ پنجاب اب کاروبار، ٹیکنالوجی، زراعت، سیاحت، تعلیم، صنعت اور سروسز کا ابھرتا ہوا مرکز بن چکا ہے۔ صوبے میں غیر ملکی سرمایہ کاروں کے لیے مختلف شعبوں میں سرمایہ کاری کے مواقع موجود ہیں اور سازگار ماحول فراہم کیا جا رہا ہے۔
ای سی او سیکرٹری جنرل کی خراجِ تحسین
ای سی او کے سیکرٹری جنرل اسد مجید خان نے کہا کہ 1992 میں سابق وزیراعظم نواز شریف کی قیادت میں پاکستان ای سی او کا رکن بنا۔ انہوں نے وزیراعظم، وزیراعلیٰ پنجاب اور خود سیکرٹری جنرل کا لاہور سے تعلق ہونا خوش آئند قرار دیا۔
وفد نے لاہور کی خوبصورتی، ثقافتی ورثے کے تحفظ اور سیاحتی اقدامات کے لیے وزیراعلیٰ اور ان کی ٹیم کی کاوشوں کو سراہا، اور انہیں خوبصورت خطاطی کا شاہکار اور دیگر یادگاری تحائف بھی پیش کیے۔
