بالی ووڈ کی بے خوف اور صاف گو اداکارہ شروتی ہاسن اپنی ذاتی زندگی اور عشق کے قصوں کی بدولت اکثر خبروں کی سرخیوں میں رہتی ہیں۔ حالیہ دنوں میں، فلم فیئر کو دیے گئے ایک انٹرویو میں انہوں نے بڑی وقار کے ساتھ ان سوالات کا سامنا کیا جن میں ان سے پوچھا گیا کہ ’’یہ آپ کے کس نمبر کے بوائے فرینڈ کی کہانی ہے؟‘‘
شروتی ہاسن ہمیشہ اپنی نجی زندگی پر کھل کر بات کرنے کے لیے جانی جاتی ہیں۔ چاہے تعلقات کی اتار چڑھاؤ کی بات ہو یا دل شکستگی کی کہانی، انہوں نے کبھی اپنے احساسات کو چھپانے کی کوشش نہیں کی۔ جب ان سے پوچھا گیا کہ کیا زندگی میں کسی چیز پر افسوس ہے، تو انہوں نے بڑی سچائی سے کہا، ’’میں نے نادانستہ طور پر کچھ لوگوں کو دکھ دیا، جس کا مجھے افسوس ہے۔ باقی کسی بات پر کوئی ندامت نہیں۔ میں مانتی ہوں کہ کبھی کبھار میرا رویہ بچگانہ رہا، لیکن یہ بھی میری زندگی کے سفر کا حصہ تھا۔ البتہ، جن لوگوں کو میں دل سے عزیز رکھتی تھی، انہیں تکلیف دینا میرے دل پر آج بھی بوجھ ہے۔‘‘
رشتوں اور دل ٹوٹنے کے موضوع پر بات کرتے ہوئے شروتی نے کہا کہ کاش وہ کبھی اپنے تعلقات کے اثر میں اتنی گہرائی سے نہ ڈوبتیں۔ انہوں نے اعتراف کیا، ’’ہم سب کی زندگی میں کوئی نہ کوئی ایسا سابق ہوتا ہے جس کی یاد چبھتی ہے، مگر مجموعی طور پر میں نے اپنے تمام پرانے تعلقات کو بغیر کسی تلخی کے پیچھے چھوڑ دیا ہے۔‘‘
جب لوگ ہنسی مذاق یا طنزیہ انداز میں ان سے پوچھتے ہیں کہ ’’اب کس نمبر کا بوائے فرینڈ ہے؟‘‘ تو شروتی نرمی سے جواب دیتی ہیں، ’’شاید آپ کے لیے یہ محض ایک عدد ہو، لیکن میرے لیے ہر رشتہ ایک ایسی کہانی ہے جب میں اپنی چاہی ہوئی محبت حاصل کرنے میں ناکام رہی۔ اس لیے مجھے کوئی شرمندگی نہیں، بس کبھی کبھی انسان ہونے کے ناتے دل ضرور دکھی ہو جاتا ہے۔‘‘
شروتی نے مزید کہا کہ وہ اپنے ہر رشتے میں وفاداری اور خلوص کے ساتھ جڑی رہیں۔ اور اگر کبھی کسی رشتے کو نہ اپنانے کا فیصلہ کیا تو انہیں کسی کے سامنے وضاحت دینے کی ضرورت محسوس نہیں ہوئی۔ انہوں نے یہ بھی تسلیم کیا کہ کسی بھی ناکام رشتے پر وہ صرف دوسروں کو قصوروار ٹھہرانے کے بجائے خود بھی احتساب کرتی ہیں۔
