ریاض۔ امریکی صدر ڈونلڈ ٹرمپ آج سعودی عرب پہنچے، جہاں ان کا شاندار استقبال سعودی ولی عہد محمد بن سلمان نے کیا۔ یہ دورہ مشرق وسطیٰ کے چار روزہ دورے کا آغاز ہے، جس میں صدر ٹرمپ قطر اور متحدہ عرب امارات کا بھی دورہ کریں گے۔
سعودی عرب آمد کے موقع پر صدر ٹرمپ اور ولی عہد محمد بن سلمان کے درمیان اہم ملاقات ہوئی، جس میں دو طرفہ اقتصادی، دفاعی اورسٹرٹیجک تعلقات پر تبادلہ خیال کیا گیا۔ ذرائع کے مطابق، ملاقات میں امریکہ میں سعودی عرب کی جانب سے 600 ارب ڈالر کی سرمایہ کاری کے منصوبے پر بات چیت کی گئی، جس میں دفاع، ٹیکنالوجی اور توانائی کے شعبے نمایاں ہیں۔
صدر ٹرمپ اس دورے کے دوران ایران کے جوہری پروگرام، غزہ کی حالیہ صورتحال، توانائی کے عالمی بحران اور خطے میں امریکی سرمایہ کاری کے فروغ جیسے اہم معاملات پر بات چیت کریں گے۔
یہ دورہ دونوں ممالک کے درمیان اسٹریٹجک شراکت داری کو مزید مستحکم کرنے اور مشرق وسطیٰ میں امریکی کردار کو تقویت دینے کی ایک اہم کڑی قرار دیا جا رہا ہے۔
