نیو یارک:امریکی عدالت نے صدر ڈونلڈ ٹرمپ کی جانب سے غیرملکی طلبا اور صحافیوں کے امریکا میں قیام کی مدت محدود کرنے والی نئی ویزا پالیسی پر عمل درآمد روک دیا ہے۔
عالمی خبر رساں ادارے کے مطابق غیرملکی طلبا اور صحافیوں سمیت اساتذہ اور جامعات کی نمائندگی کرنے والے اتحاد نے نئی پالیسی کے خلاف عدالت سے رجوع کیا تھا۔
نئے قواعد کے تحت غیرملکی طلبا کو زیادہ سے زیادہ 4 سال تک امریکا میں قیام کی اجازت دی جانی تھی جبکہ صحافیوں کے لیے یہ مدت صرف 240 دن مقرر کی گئی تھی۔ چینی صحافیوں کے لیے مجوزہ قیام کی مدت 90 دن تھی۔
ڈسٹرکٹ جج ڈینس سیلر نے ابتدائی حکم امتناع جاری کرتے ہوئے نئی پالیسی پر عمل درآمد روک دیا۔ حتمی فیصلہ آنے تک پرانے قواعد برقرار رہیں گے جن کے تحت طلبا تعلیم مکمل ہونے تک اور غیرملکی صحافی 5 سال تک امریکا میں قیام کرسکتے ہیں۔
