اسلام آباد ایئرپورٹ پر ایف آئی اے کی بڑی کارروائی، جعلی بچوں کے ہمراہ ہانگ کانگ جانے والے پانچ مسافر پکڑے گئے
ایف آئی اے امیگریشن نے اسلام آباد ایئرپورٹ پر کارروائی کرتے ہوئے پانچ ایسے مسافروں کو آف لوڈ کر دیا جو جعل سازی کے ذریعے خود کو بچوں کے طور پر ظاہر کر کے ہانگ کانگ روانہ ہونے کی کوشش کر رہے تھے۔
ترجمان ایف آئی اے کے مطابق مسافر تھائی لینڈ کے وزٹ ویزے پر ہانگ کانگ جانا چاہتے تھے۔ حراست میں لیے گئے مسافروں میں بشریٰ، امجد علی، علیزے شاہین، محمد عدنان اور ذیشان علی خان شامل ہیں۔ ان میں سے امجد علی خاتون مسافر بشریٰ کا حقیقی بیٹا ہے تاہم باقی تین افراد کو اس کے بچے ظاہر کر کے بیرون ملک بھیجنے کی کوشش کی گئی۔
ابتدائی تحقیقات سے انکشاف ہوا کہ علیزے شاہین، محمد عدنان اور ذیشان علی کا بشریٰ سے کوئی رشتہ نہیں۔ مزید برآں، ان کے گھر والوں نے فی کس ڈیڑھ کروڑ روپے ایجنٹ کو ادا کیے جس نے نادرا ریکارڈ میں جعل سازی کرتے ہوئے ان افراد کو اعجاز علی کے خاندان میں شامل کر دیا۔ ریکارڈ میں تینوں کو اعجاز علی کے بچے ظاہر کیا گیا اور ان کا پتہ صوابی درج کیا گیا۔
تفتیشی ذرائع کے مطابق علیزے شاہین کا تعلق سرگودھا، محمد عدنان کا اٹک اور ذیشان علی کا تعلق خوشاب سے ہے۔
ایف آئی اے نے انکشاف کیا ہے کہ مسافروں کو سہولت فراہم کرنے میں پاکستان ایئرپورٹ اتھارٹی کا ایک اہلکار بھی ملوث پایا گیا ہے جسے شامل تفتیش کر لیا گیا۔ اس اہلکار کے ساتھ رابطے میں موجود دیگر افراد کی معلومات بھی اکٹھی کر لی گئی ہیں۔
پانچوں مسافروں کو مزید قانونی کارروائی کے لیے اینٹی ہیومن ٹریفکنگ سرکل اسلام آباد منتقل کر دیا گیا ہے جبکہ نادرا اور پاسپورٹ حکام کی ممکنہ شمولیت کے حوالے سے بھی تحقیقات کو مزید وسیع کر دیا گیا ہے۔
