اسلام آباد: معروف اداکارہ، مصنفہ اور ڈرامہ نگار میرا سیٹھی نے دو برس بعد اپنی طلاق کی تصدیق کرتے ہوئے پہلی بار اس ذاتی صدمے اور اس سے جڑے تجربات پر کھل کر گفتگو کی ہے
حال ہی میں ایک انٹرویو میں میرا سیٹھی نے انکشاف کیا کہ ان کی ازدواجی زندگی مارچ 2023 میں ختم ہوئی، اسی دوران وہ ڈرامہ سیریل اَن کہی کی شوٹنگ میں مصروف تھیں ان کے مطابق یہ دور ان کی زندگی کے سب سے مشکل ادوار میں شمار ہوتا ہے
انہوں نے یاد دلایا کہ کئی سال پہلے وہ ایک ڈرامے میں یہ مکالمہ ادا کر چکی ہیں کہ “طلاق یافتہ عورت معاشرے کے لیے کانٹا بن جاتی ہے” میرا سیٹھی نے کہا کہ یہ جملہ آج بھی ان کے دل میں تازہ ہے تاہم اب حالات میں کافی تبدیلی آ چکی ہے آج انڈسٹری میں کئی فنکارائیں اس موضوع پر کھل کر بات کرتی ہیں لیکن شادی کے خاتمے کے بعد پیدا ہونے والا درد اور شناخت کا بحران اپنی جگہ ایک حقیقت ہے
اداکارہ کے مطابق طلاق کے بعد وہ گزشتہ ڈھائی سال سے خود احتسابی اور اپنی ذات کو سمجھنے کے عمل سے گزر رہی ہیں ان کا کہنا تھا کہ ایک اداکارہ کے لیے یہ اور بھی اہم ہے کیونکہ ان کی زندگی بڑی حد تک پردے پر سب کے سامنے ہوتی ہے
میرا سیٹھی نے بتایا کہ اس مشکل وقت میں دوستوں اور اہل خانہ نے غیر معمولی ساتھ دیا جب کہ چند اجنبیوں کی مدد بھی ان کے لیے حوصلے کا باعث بنی
انہوں نے تسلیم کیا کہ طلاق انسان کی شخصیت اور نفسیات پر گہرے اثرات ڈالتی ہے اور اس صدمے کو سہنے میں وقت درکار ہوتا ہے تاہم اس موقع نے انہیں اپنی اندرونی دنیا کو بہتر طور پر سمجھنے کا موقع دیا جو ان کے لیے ایک مثبت اور لازمی تجربہ ثابت ہوا
یاد رہے کہ میرا سیٹھی نے 2019 میں اپنے قریبی دوست بلال صدیقی سے امریکہ میں شادی کی تھی جب کہ ان کی منگنی ایک سال قبل ہوئی تھی
