نمیبیا نے افریقی کوالیفائرز کے سیمی فائنل میں تنزانیہ کو با آسانی شکست دے کر ٹی ٹوئنٹی ورلڈکپ 2026 میں جگہ بنالی۔ یہ نمیبیا کا چوتھا ورلڈکپ ہوگا، اس سے قبل وہ 2021، 2022 اور 2024 کے ایڈیشنز میں بھی شریک رہ چکا ہے۔
دوسرے سیمی فائنل میں زمبابوے نے کینیا کو 7 وکٹوں سے ہرا کر ورلڈکپ کے لیے کوالیفائی کیا۔
اس سے قبل یورپی کوالیفائرز میں اٹلی نے تاریخ رقم کرتے ہوئے پہلی بار ٹی ٹوئنٹی ورلڈکپ کے لیے کوالیفائی کیا جبکہ نیدرلینڈز بھی یورپ سے ایونٹ میں جگہ بنانے والی ٹیموں میں شامل ہوا۔
آئی سی سی کے مطابق آئندہ سال منعقد ہونے والے ٹی ٹوئنٹی ورلڈکپ میں مجموعی طور پر 20 ٹیمیں حصہ لیں گی۔ میزبان بھارت اور سری لنکا کے ساتھ ساتھ افغانستان، آسٹریلیا، بنگلادیش، انگلینڈ، جنوبی افریقا، ویسٹ انڈیز، امریکا اور نیوزی لینڈ گزشتہ ورلڈکپ کے سپر ایٹ مرحلے میں پہنچنے کے باعث براہِ راست ایونٹ کا حصہ ہوں گے۔
ان کے علاوہ پاکستان اور آئرلینڈ نے آئی سی سی ٹی ٹوئنٹی رینکنگ کی بنیاد پر ورلڈکپ میں کوالیفائی کیا ہے۔ مزید تین ٹیموں کا فیصلہ امریکا، ایشیا اور ایسٹ ایشیا پیسیفک ریجن کے کوالیفائرز سے ہوگا جس کے بعد مکمل ٹیموں کا اعلان کیا جائے گا۔
ورلڈکپ 2026 میں ٹیموں کی ریکارڈ تعداد اور نئے ممالک کی شمولیت نے شائقین کرکٹ کے جوش و خروش کو مزید بڑھا دیا ہے۔
