اسلام آباد – پاک سوزوکی نے 2025 میں اپنی مقبول گاڑی کلٹس کو بغیر کسی نمایاں تبدیلی کے دوبارہ متعارف کرا دیا ہے۔ تاہم قیمتوں میں حالیہ اضافہ خریداروں کے لیے فیصلہ سازی کو قدرے مشکل بنا رہا ہے۔
سوزوکی کلٹس ہمیشہ سے ان افراد کی پسند رہی ہے جو شہری علاقوں میں روزمرہ کے لیے ایک پائیدار، کم ایندھن خرچ کرنے والی اور مناسب قیمت والی کار چاہتے ہیں۔ جون 2025 میں اس گاڑی کی قیمتیں اور خصوصیات ایک بار پھر توجہ کا مرکز بن گئی ہیں۔
پاک سوزوکی کی آفیشل ویب سائٹ کے مطابق سوزوکی کلٹس وی ایکس آر کی قیمت 37 لاکھ 18 ہزار روپے ہے۔
سوزوکی کلٹس وی ایکس ایل کی قیمت 40 لاکھ 84 ہزار روپے مقرر کی گئی ہے۔
جبکہ سوزوکی کلٹس اے جی ایس (آٹو گیئر شفٹ) کی قیمت 43 لاکھ 66 ہزار روپے رکھی گئی ہے۔یہ تمام قیمتیں ایکس فیکٹری ہیں، جن میں رجسٹریشن فیس اور دیگر ٹیکس شامل نہیں۔
کلٹس 2025 کا بیرونی ڈیزائن پچھلے ماڈل سے کافی حد تک مماثلت رکھتا ہے، تاہم اب بھی اسے ایک جدید اور اسٹائلش گاڑی تصور کیا جاتا ہے۔
گاڑی میں ہیلوجن ہیڈ لائٹس، مناسب اونچائی (گراؤنڈ کلیئرنس) اور ایک معیاری فرنٹ گرل موجود ہے، جو اسے روایتی مگر پُرکشش شکل دیتے ہیں۔
وی ایکس ایل اور اے جی ایس ویرینٹس میں پاور ونڈوز، پاور اسٹیئرنگ، سینٹرل لاکنگ اور ٹچ اسکرین میڈیا یونٹ جیسی سہولیات شامل ہیں، جب کہ وی ایکس آر ماڈل میں یہ فیچرز محدود پیمانے پر دستیاب ہیں۔
سوزوکی کلٹس میں 998 سی سی کا K10B انجن موجود ہے جو شہری ٹریفک میں اوسطاً 17 سے 18 کلومیٹر فی لیٹر ایندھن فراہم کرتا ہے۔ یہ انجن اپنی ہموار ڈرائیو اور کم مینٹیننس کے لیے جانا جاتا ہے۔
سیکیورٹی کے حوالے سے، وی ایکس ایل اور اے جی ایس ماڈلز میں ڈوئل ایئر بیگز اور اینٹی لاک بریکنگ سسٹم (ABS) شامل ہیں، جو حفاظتی لحاظ سے اسے بہتر بناتے ہیں۔ وی ایکس آر ویرینٹ میں یہ سیفٹی فیچرز موجود نہیں۔
