اسلام آباد ۔پاکستان اسپورٹس بورڈ (PSB) کے الیکشن کمیشن نے چیس فیڈریشن آف پاکستان میں سینئر نائب صدر کے عہدے کے لیے انتخابی شیڈول کا باضابطہ اعلان کر دیا ہے۔
ترجمان پی ایس بی کے مطابق یہ انتخابات پاکستان اسپورٹس بورڈ کے 2022 کے آئین، قومی اسپورٹس پالیسی 2005، اسپورٹس الیکشن ریگولیشنز 2024، اور چیس فیڈریشن آف پاکستان کے داخلی آئینی قواعد و ضوابط کے تحت مکمل کرائے جائیں گے۔
الیکشن کمیشن کی طرف سے جاری کردہ نوٹیفکیشن کے مطابق، تمام متعلقہ صوبائی ایسوسی ایشنز، الحاق شدہ ادارے اور دیگر تنظیمیں 26 جون 2025 تک اپنے ووٹرز اور امیدواروں کی نامزدگی فارم جمع کروا سکیں گی۔
27 جون کو جمع شدہ دستاویزات کی جانچ پڑتال مکمل ہونے کے بعد عبوری ووٹر لسٹ اور امیدواروں کی ابتدائی فہرست جاری کی جائے گی۔ اس پر اعتراضات جمع کروانے کی آخری تاریخ 30 جون مقرر کی گئی ہے، جن پر فیصلے 2 جولائی کو سنائے جائیں گے۔ اسی روز حتمی ووٹر لسٹ اور تصدیق شدہ امیدواروں کی فہرست بھی جاری کی جائے گی۔
شیڈول کے مطابق، پولنگ کا عمل 7 جولائی 2025 کو صبح 11 بجے اسلام آباد میں واقع پاکستان اسپورٹس بورڈ کے کمیٹی روم میں ہوگا، جس کے فوراً بعد انتخابی نتائج کا اعلان کیا جائے گا۔
الیکشن کمیشن نے یہ بھی واضح کیا ہے کہ تمام نامزدگیاں، اعتراضات، اور ووٹر لسٹیں براہ راست “الیکشن کمیشن، پاکستان اسپورٹس بورڈ، اسلام آباد” کے پتے پر جمع کروائی جائیں۔
الیکشن کمیشن کی قیادت وسیم ماجد ملک کر رہے ہیں، جبکہ بابر سہیل اور ذوہیب حسن گوندل بطور اراکین فرائض انجام دے رہے ہیں۔
