لاہور ۔ محرم الحرام کے دوران ممکنہ سکیورٹی خطرات کے پیش نظر وزارت داخلہ نے ملک بھر میں پاک فوج کی تعیناتی کا فیصلہ کیا ہے۔ اس سلسلے میں وزارت داخلہ کی جانب سے وفاقی کابینہ کو ایک سمری ارسال کی گئی تھی، جس کی منظوری کے بعد باضابطہ نوٹیفکیشن بھی جاری کر دیا گیا ہے۔
جاری کردہ اعلامیے کے مطابق، پاک فوج چاروں صوبوں، گلگت بلتستان، آزاد جموں و کشمیر اور وفاقی دارالحکومت اسلام آباد میں سکیورٹی فرائض سرانجام دے گی۔ یہ اقدام صوبائی حکومتوں اور متعلقہ اداروں کی درخواست پر اٹھایا گیا ہے، جنہوں نے محرم کے دوران حساس مقامات پر اضافی حفاظتی اقدامات کی ضرورت پر زور دیا تھا۔
فوجی تعیناتی آئینِ پاکستان کے آرٹیکل 245 کے تحت کی گئی ہے، جس کے تحت فوج کو سول اداروں کی مدد کے لیے تعینات کیا جا سکتا ہے۔ اس دوران فوجی دستے پولیس اور رینجرز کے ساتھ مل کر مشترکہ نگرانی، گشت اور دیگر سکیورٹی اقدامات انجام دیں گے۔
ذرائع کے مطابق، سکیورٹی کے پیش نظر حساس شہروں اور علاقوں میں نگرانی کے لیے سی سی ٹی وی کیمروں کا استعمال بڑھایا جا رہا ہے، جبکہ بعض مقامات پر عارضی طور پر انٹرنیٹ سروس معطل کرنے پر بھی غور کیا جا رہا ہے، خاص طور پر ان علاقوں میں جہاں ماضی میں فرقہ وارانہ نوعیت کے واقعات پیش آ چکے ہیں۔
وزارت داخلہ نے عوام سے اپیل کی ہے کہ محرم کے ایام میں کسی بھی مشکوک سرگرمی یا غیر معمولی حرکت کی فوری اطلاع متعلقہ سکیورٹی اداروں کو دیں، تاکہ کسی بھی ناخوشگوار واقعے سے بر وقت نمٹا جا سکے۔
