اسلام آباد۔وفاقی حکومت نے فرنٹیئر کانسٹیبلری کو ایک ملک گیر وفاقی فورس میں تبدیل کرنے کا حتمی فیصلہ کر لیا ہے۔
ذرائع کے مطابق، وفاقی سطح پر فرنٹیئر کانسٹیبلری (ایف سی) کو وسعت دیتے ہوئے اسے ایک ایسی فورس بنانے کا منصوبہ تیار کیا گیا ہے جو پورے ملک میں اپنی کارروائیاں انجام دے سکے۔
اس فیصلے پر عمل درآمد کے لیے، وفاقی کابینہ کی منظوری کے بعد فرنٹیئر کانسٹیبلری ایکٹ 1915 میں ضروری ترامیم کی جائیں گی، جن کی بنیاد پر ایک نیا آرڈیننس جاری کیا جائے گا تاکہ ایف سی کے دائرہ کار کو پورے پاکستان تک پھیلایا جا سکے۔
ذرائع کا کہنا ہے کہ اس فورس کا نیا نام “فیڈرل کانسٹیبلری” رکھا جائے گا، جسے چاروں صوبوں، وفاقی دارالحکومت اسلام آباد، آزاد کشمیر اور گلگت بلتستان میں فرائض سرانجام دینے کا اختیار حاصل ہوگا۔
آرڈیننس کے نفاذ کے بعد اس نئی فورس کے لیے ملک بھر میں بھرتیاں کی جائیں گی اور مختلف علاقوں میں اس کے دفاتر قائم کیے جائیں گے۔ تنظیم نو کے تحت فیڈرل کانسٹیبلری کی قیادت پولیس سروس آف پاکستان کے افسران سنبھالیں گے۔
ذرائع کا یہ بھی کہنا ہے کہ فیڈرل کانسٹیبلری کے قیام کا مقصد ملک میں امن و امان کو بہتر بنانا اور داخلی سیکیورٹی کو مؤثر اور مضبوط بنانا ہے۔ اس اقدام کو ملک گیر سطح پر سیکیورٹی کے ڈھانچے کو منظم کرنے کی بڑی کوشش کا حصہ قرار دیا جا رہا ہے۔
