راولپنڈی، اسلام آباد اور گردونواح میں موسلا دھار بارشوں نے تباہی مچا دی۔ نالہ لئی میں پانی کی سطح 21 فٹ سے تجاوز کر گئی جبکہ دریائے سواں میں شدید طغیانی کے باعث نشیبی علاقوں میں پانی گھروں میں داخل ہو گیا۔ متعدد گاڑیاں سیلابی ریلے میں بہہ گئیں۔ چکری کے علاقے لادیاں میں پھنسے ہوئے 19 افراد کو بحفاظت محفوظ مقام پر منتقل کیا گیا۔
راولپنڈی میں ریکارڈ بارش کے باعث شہر بھر میں شدید نقصان ہوا۔ نالہ لئی کی سطح بلند ہونے پر خطرے کی گھنٹیاں بجا دی گئیں اور شہریوں کو انخلا کی ہدایات جاری کی گئیں۔
شہری گھروں کی چھتوں پر اذانیں دے کر خدا سے مدد مانگتے رہے۔ پیرودھائی، ٹینچ بھاٹہ، اریہ محلہ، ڈھوک سیداں، قریشی آباد، گرجا روڈ، دھمیال، چکری، اڈیالہ روڈ، ندیم کالونی اور جاوید کالونی سمیت مختلف علاقوں میں پانی گھروں میں داخل ہوگیا، جس سے قیمتی سامان، فرنیچر اور گاڑیاں متاثر ہوئیں۔
نالہ لئی سے آنے والا ریلا دریائے سواں کے مقام پر تباہ کن ثابت ہوا، یہاں تک کہ پوش رہائشی علاقوں میں بھی پانی داخل ہو گیا اور لوگ گھروں میں محصور ہو کر رہ گئے۔
واسا حکام کے مطابق راولپنڈی اور اسلام آباد میں مجموعی طور پر 250 ملی میٹر سے زائد بارش ریکارڈ کی گئی۔ سب سے زیادہ بارش گوالمنڈی میں 235 ملی میٹر، نیو کٹاریاں میں 220 ملی میٹر جبکہ پیرودھائی میں 200 ملی میٹر ریکارڈ ہوئی۔
کمشنر راولپنڈی عامر خٹک نے کہا کہ ریسکیو 1122 اور دیگر متعلقہ ادارے مکمل طور پر الرٹ ہیں۔
ریسکیو 1122 کی جانب سے ضلع بھر میں ریسکیو آپریشن جاری ہے۔ ترجمان کے مطابق لادیاں سے 19 افراد کو محفوظ مقام پر منتقل کیا گیا جبکہ مجموعی طور پر 59 افراد کو بچایا گیا۔
ہاتھی چوک کے نالے میں ڈوبنے والے بچے کی تلاش جاری ہے۔ راولپنڈی کنٹونمنٹ بورڈ، چکلالہ کنٹونمنٹ بورڈ، راولپنڈی ویسٹ مینجمنٹ کمپنی اور دیگر ادارے فیلڈ میں موجود ہیں تاکہ شہریوں کی مشکلات کم کی جا سکیں۔
موسمی صورتحال کے باعث ضلع راولپنڈی میں ایک روزہ تعطیل کا اعلان کیا گیا ہے۔ ڈپٹی کمشنر نے نوٹیفکیشن جاری کرتے ہوئے شہریوں سے اپیل کی کہ بلا ضرورت گھروں سے باہر نہ نکلیں۔
وزیراعلیٰ پنجاب مریم نواز شریف نے سوشل میڈیا پلیٹ فارم ایکس پر جاری بیان میں کہا کہ غیر معمولی بارشوں اور سیلابی صورت حال کے پیش نظر پنجاب کے مختلف علاقوں میں رین ایمرجنسی نافذ کر دی گئی ہے۔ انہوں نے بتایا کہ سرکاری ادارے جذبے اور انتھک محنت کے ساتھ کام کر رہے ہیں۔ عوام کو سائرن اور اعلانات کے ذریعے خبردار کیا جا رہا ہے۔
وزیراعلیٰ نے شہریوں پر زور دیا کہ وہ حکومتی اداروں سے تعاون کریں اور حفاظتی ہدایات پر عمل کریں۔
وزیراعظم شہباز شریف نے راولپنڈی میں سیلابی صورت حال کے باعث فوری طور پر ہنگامی اجلاس طلب کیا ہے۔
ذرائع کے مطابق وزیراعظم نے چیف کمشنر راولپنڈی اور ایم ڈی واسا سے فوری رپورٹ طلب کر لی ہے۔ اجلاس میں بارش سے ہونے والے نقصانات اور حفاظتی اقدامات کا جائزہ لیا جائے گا۔
وزیراعظم محمد شہباز شریف آج نیشنل ڈیزاسٹر مینجمنٹ اتھارٹی (این ڈی ایم اے) کا ہنگامی دورہ کریں گے تاکہ ملک بھر میں جاری شدید بارشوں اور دریاؤں میں طغیانی کی صورت حال کا جائزہ لے سکیں۔
دورے کے دوران وزیراعظم کو بارشوں، سیلابی کیفیت اور ممکنہ خطرات سے متعلق تفصیلی بریفنگ دی جائے گی۔ این ڈی ایم اے حکام انہیں متاثرہ علاقوں میں امدادی کارروائیوں، حفاظتی تدابیر اور ادارہ جاتی حکمت عملی سے متعلق آگاہ کریں گے۔
کمانڈ اینڈ کنٹرول سینٹر سیٹلائٹ تصاویر کی مدد سے آئندہ موسم کی پیشگوئی اور خطرات سے متعلق ابتدائی معلومات بھی فراہم کرے گا۔
یہ دورہ متاثرہ علاقوں میں بروقت امدادی اقدامات اور مؤثر ردعمل کی یقینی دہانی کے لیے نہایت اہم قرار دیا جا رہا ہے۔
