کراچی۔وزیرِاعظم شہباز شریف نے ملک بھر میں جاری مون سون بارشوں اور سیلابی صورتحال کے پیشِ نظر مختلف سیاسی رہنماؤں سے رابطے کیے۔
وزیرِاعظم نے چیئرمین پاکستان پیپلز پارٹی بلاول بھٹو زرداری کو ٹیلی فون پر گفتگو کرتے ہوئے جنوبی سندھ خصوصاً کراچی میں شدید بارشوں سے پیدا ہونے والے شہری سیلاب اور انسانی جانوں کے ضیاع پر گہرے دکھ اور افسوس کا اظہار کیا۔
اس موقع پر انہوں نے حکومتِ سندھ کے لیے وفاق کی جانب سے ہر ممکن تعاون اور مدد کی پیشکش کرتے ہوئے چیئرمین این ڈی ایم اے کو ہدایت دی کہ وہ سندھ حکومت کے ساتھ مکمل ہم آہنگی رکھیں، صوبائی ڈیزاسٹر مینجمنٹ اتھارٹی کو بھرپور معاونت فراہم کریں اور عوام کو ممکنہ خطرات سے پیشگی آگاہ کیا جائے۔
وزیراعظم نے امیر جماعت اسلامی حافظ نعیم الرحمن سے بھی گفتگو کی، جس میں خیبرپختونخوا میں حالیہ بارشوں کے باعث ہونے والے نقصانات اور جاری امدادی سرگرمیوں پر تبادلہ خیال کیا گیا۔ شہباز شریف نے الخدمت فاؤنڈیشن کی جانب سے ریسکیو اور امدادی کاموں میں سرگرم کردار کو سراہا۔
اسی طرح وزیرِاعظم نے وفاقی وزیر برائے تعلیم و پیشہ ورانہ تربیت ڈاکٹر خالد مقبول صدیقی سے بھی ٹیلی فونک رابطہ کیا، جس میں سندھ میں حالیہ اور آئندہ ممکنہ بارشوں سے پیدا ہونے والے خطرات پر گفتگو ہوئی۔
وزیرِاعظم نے اس موقع پر یقین دہانی کرائی کہ وفاقی حکومت، این ڈی ایم اے اور دیگر متعلقہ وفاقی اداروں کے ذریعے صوبوں کو ہر ممکن تعاون فراہم کرے گی تاکہ کسی بھی ہنگامی صورتحال کا بھرپور مقابلہ کیا جا سکے۔
