بین الاقوامی قانونی ٹیم نے بانی پی ٹی آئی اور ان کی اہلیہ بشریٰ بی بی کے حوالے سے اقوام متحدہ کے اسپیشل رپورٹر برائے تشدد کے سامنے ایک فوری اپیل دائر کی ہے۔
ترجمان تحریک انصاف پنجاب علی عمران کے مطابق یہ اپیل بانی پی ٹی آئی کی جانب سے ان کے بیٹے قاسم خان اور سلیمان خان نے جمع کرائی جبکہ بشریٰ بی بی کی جانب سے ان کی بہن مریم وٹو نے پیش کی۔ اپیل میں مؤقف اپنایا گیا ہے کہ دونوں رہنماؤں کو جیل میں غیر انسانی اور بنیادی انسانی حقوق کے برعکس حالات کا سامنا ہے۔
متن کے مطابق بانی پی ٹی آئی کو طویل عرصے سے تنہائی میں قید رکھا گیا ہے، انہیں علاج کی سہولتوں سے محروم کر دیا گیا ہے، ناقص خوراک فراہم کی جا رہی ہے اور اہل خانہ و وکلا سے ملاقاتوں پر سخت پابندیاں عائد ہیں۔
اسی طرح بشریٰ بی بی کو بھی جیل میں نامناسب اور غیر انسانی حالات میں رکھا گیا ہے جس سے ان کی صحت بری طرح متاثر ہو رہی ہے اور انہیں طبی سہولتیں فراہم نہیں کی جا رہیں۔
بین الاقوامی قانونی ٹیم نے اقوام متحدہ سے اپیل کی ہے کہ وہ اس معاملے کی فوری جانچ کرے اور بانی پی ٹی آئی اور بشریٰ بی بی کی فوری رہائی کو یقینی بنایا جائے۔
