فیلڈ مارشل سید عاصم منیر نے قصور سیکٹر اور جلالپور پیر والا، ملتان میں قائم فلڈ ریلیف کیمپوں کا معائنہ کیا۔
آئی ایس پی آر کے مطابق اس موقع پر انہوں نے حالیہ سیلابی صورتحال اور جاری امدادی سرگرمیوں کا جائزہ لیا۔ دورے کا مقصد سول انتظامیہ اور فوج کے درمیان ہم آہنگی کو مزید مؤثر بنانا تھا تاکہ متاثرہ افراد کو بروقت اور بہتر سہولتیں فراہم کی جا سکیں۔ چیف سیکرٹری پنجاب سمیت سول انتظامیہ کے دیگر اعلیٰ حکام بھی موجود تھے جبکہ آرمی چیف کو زمینی حالات اور جاری ریسکیو و ریلیف آپریشنز پر تفصیلی بریفنگ دی گئی۔
سول انتظامیہ سے گفتگو کرتے ہوئے فیلڈ مارشل نے اچھی حکمرانی اور عوام دوست ترقیاتی اقدامات کی ضرورت پر زور دیا۔ ان کا کہنا تھا کہ بنیادی ڈھانچے کی ترقی سمیت وہ تمام اقدامات ترجیحی بنیادوں پر مکمل کیے جائیں جو بار بار آنے والے سیلابوں سے عوام کے تحفظ کے لیے ناگزیر ہیں کیونکہ ریاست ہر سال قیمتی جانوں اور املاک کے نقصان کی متحمل نہیں ہو سکتی۔
فیلڈ مارشل سید عاصم منیر نے سیلاب متاثرین سے بھی ملاقات کی جنہیں پاک فوج اور سول انتظامیہ نے محفوظ مقامات پر منتقل کیا تھا۔ متاثرہ افراد نے مشکل گھڑی میں فوری مدد فراہم کرنے پر پاک فوج کا شکریہ ادا کیا۔
