پاکستان میں سروائیکل کینسر کے بڑھتے ہوئے کیسز کے پیشِ نظر حکومت نے اس بیماری سے بچاؤ کے لیے HPV ویکسین مفت فراہم کرنے کا اعلان کر دیا ہے۔
تفصیلات کے مطابق سروائیکل کینسر سے بچاؤ کی مہم 15 ستمبر سے شروع ہوگی۔ یہ خواتین میں پایا جانے والا دوسرا بڑا مہلک کینسر ہے جو رحم کے نچلے حصے میں پیدا ہوتا ہے۔
عالمی ادارہ صحت (ڈبلیو ایچ او) کے مطابق سروائیکل کینسر زیادہ تر ہیومن پاپیلوما وائرس (HPV) کی وجہ سے لاحق ہوتا ہے اور اگر بروقت تشخیص نہ ہو تو جان لیوا بھی ثابت ہو سکتا ہے۔
ماہرین صحت کا کہنا ہے کہ اس بیماری کی ابتدائی علامات عموماً واضح نہیں ہوتیں، اسی وجہ سے مریضہ اکثر تاخیر سے علاج کی طرف آتی ہے۔ بعد ازاں غیر معمولی خون آنا، بدبودار رطوبت خارج ہونا اور کمر یا پیٹ میں درد جیسی علامات ظاہر ہوتی ہیں۔
اعداد و شمار کے مطابق پاکستان میں ہر سال تقریباً 5 ہزار خواتین میں سروائیکل کینسر کی تشخیص ہوتی ہے جبکہ 3 ہزار سے زائد خواتین اس مرض کے باعث جان کی بازی ہار جاتی ہیں۔ ماہرین کے مطابق شرح اموات زیادہ ہونے کی ایک بڑی وجہ یہ ہے کہ زیادہ تر خواتین باقاعدگی سے Pap smear یا HPV ٹیسٹ نہیں کرواتیں جن سے بروقت تشخیص ممکن ہے۔
حکومت نے اعلان کیا ہے کہ 15 سے 27 ستمبر تک HPV ویکسینیشن مہم جاری رہے گی۔ پہلے مرحلے میں پنجاب، سندھ، اسلام آباد اور آزاد جموں و کشمیر میں 9 سے 14 سال کی بچیوں کو یہ ویکسین مفت فراہم کی جائے گی۔
