لزبن: پرتگالی وزارتِ خارجہ نے اپنے بیان میں کہا ہے کہ پرتگال اتوار کے روز باضابطہ طور پر فلسطین کو ایک ریاست کے طور پر تسلیم کرے گا۔
غیر ملکی خبر رساں ادارے کے مطابق وزیرِ خارجہ پاؤلو رینگل نے برطانیہ کے حالیہ دورے کے دوران اشارہ دیا تھا کہ پرتگال اس حوالے سے غور کر رہا ہے۔ اب حکومت نے فلسطینی ریاست کو تسلیم کرنے کے فیصلے کا باضابطہ اعلان کر دیا ہے۔
یہ پیش رفت ایسے موقع پر سامنے آئی ہے جب رواں ماہ اقوام متحدہ کی جنرل اسمبلی کے اجلاس میں کئی ممالک فلسطین کو ریاست تسلیم کرنے کا اعلان کرنے والے ہیں جن میں پرتگال بھی شامل ہوگا۔
اس سے قبل پرتگال نے یورپی یونین کے بعض دیگر رکن ممالک کی نسبت زیادہ محتاط مؤقف اپنایا تھا اور یونین کے اندر مشترکہ پالیسی پر زور دیا تھا۔
یاد رہے کہ پرتگال اس معاملے میں تنہا نہیں ہے۔ اس سے پہلے فرانس برطانیہ آسٹریلیا کینیڈا اور متعدد دیگر ممالک فلسطین کو ریاست کے طور پر تسلیم کر چکے ہیں۔
