لاہور: وزیراعلیٰ پنجاب مریم نوازشریف سے جرمن ادارے ہوپ چلڈرن کینسر سینٹر کے اعلیٰ سطحی وفد نے ملاقات کی جس میں بچوں کے کینسر کے علاج کے حوالے سے جرمنی کی جانب سے تعاون پر اصولی اتفاق کیا گیا۔
تفصیلات کے مطابق وفد کی قیادت جرمن پیڈیاٹرک آنکالوجسٹ و نیورو آنکالوجسٹ اور ڈائریکٹر ڈاکٹر اسٹیفن مائیکل نے کی جبکہ اس میں ہیڈلبرگ یونیورسٹی اسپتال، جرمن کینسر ریسرچ سینٹر اور ہوپ چلڈرن کینسر سینٹر کے ماہرین بھی شامل تھے۔
ڈاکٹر اسٹیفن مائیکل نے پنجاب میں کینسر کے مریضوں کے علاج کے لیے حکومت پنجاب کی کاوشوں کو سراہا۔ وزیراعلیٰ مریم نواز نے کہا کہ پنجاب خطے کا پہلا صوبہ ہے جس نے ابلیشن کینسر ٹریٹمنٹ متعارف کرایا ہے، جبکہ لاہور میں نواز شریف کینسر اسپتال تیزی سے تکمیل کے مراحل میں ہے جو پاکستان کا سب سے بڑا اور جدید ترین اسپتال ہوگا۔
انہوں نے مزید کہا کہ چلڈرن اسپتال لاہور میں کینسر کے علاج کے لیے جرمن ادارے ہوپ چلڈرن کینسر سینٹر کی معاونت کو سراہا جائے گا اور پیڈیاٹرک آنکالوجی میں جرمنی کی جدید ٹیکنالوجی کا خیرمقدم کیا جائے گا۔ مریم نواز کے مطابق جرمن ماہرین کے ساتھ مشترکہ تربیت سے علاج کے خاطر خواہ نتائج برآمد ہوں گے۔
ہیڈلبرگ سٹی کونسل کے پارلیمانی لیڈر وسیم بٹ نے کہا کہ لاہور اور ہیڈلبرگ کے درمیان تعلیمی و ثقافتی روابط مزید مضبوط بنائے جا رہے ہیں۔ اس موقع پر ہیڈلبرگ کے لارڈ میئر پروفیسر ڈاکٹر ایکارٹ ورزنر نے وزیراعلیٰ پنجاب کی مہمان نوازی پر شکریہ ادا کیا۔
