اسلام آباد: انسدادِ دہشت گردی عدالت اسلام آباد نے پاکستان تحریکِ انصاف کے رہنما اسد قیصر کے وارنٹ گرفتاری جاری کرتے ہوئے انہیں گرفتار کرکے عدالت میں پیش کرنے کا حکم دے دیا۔ یہ کارروائی بانی پی ٹی آئی اور دیگر رہنماؤں کے خلاف جوڈیشل کمپلیکس حملہ کیس میں کی گئی۔
انسدادِ دہشت گردی عدالت کے جج طاہر عباس سپرا نے مقدمے کی سماعت کی جس دوران پرویز الٰہی، اسد عمر اور شبلی فراز کی حاضری سے استثنا کی درخواستیں منظور کر لی گئیں۔ تاہم بانی پی ٹی آئی کے حوالے سے وزارتِ قانون کو بھیجے گئے خط کا جواب تاحال موصول نہیں ہوا۔
سماعت کے دوران چوہدری پرویز الٰہی کی جانب سے سردار محمد رزاق ایڈووکیٹ عدالت میں پیش ہوئے جبکہ پی ٹی آئی رہنماؤں کی جانب سے سردار محمد مصروف خان، آمنہ علی اور دیگر وکلاء نے نمائندگی کی۔
عدالت نے مقدمے کی مزید سماعت 6 اکتوبر تک ملتوی کر دی۔ واضح رہے کہ پی ٹی آئی رہنماؤں کے خلاف تھانہ سی ٹی ڈی میں مقدمہ درج ہے۔
