نیویارک: امریکی صدر ڈونلڈ ٹرمپ نے عرب اسلامی سربراہی اجلاس کے اختتام پر پاکستان کے وزیراعظم شہباز شریف سے خوشگوار اور غیر رسمی ملاقات کی۔ اس موقع پر دونوں رہنماؤں نے دوستانہ ماحول میں مصافحہ کیا جبکہ نائب وزیراعظم اسحاق ڈار بھی موجود تھے۔
ذرائع کے مطابق وزیراعظم شہباز شریف اور صدر ٹرمپ کے درمیان 25 ستمبر کو ون آن ون ملاقات کا امکان ہے جس میں اہم عالمی اور علاقائی امور پر تفصیلی تبادلہ خیال متوقع ہے۔
اقوام متحدہ کی جنرل اسمبلی کے اجلاس کے دوران نجی نیوز چینل کو دیے گئے خصوصی انٹرویو میں وزیراعظم شہباز شریف نے کہا کہ امریکی صدر عالمی امن کے قیام کے لیے سنجیدہ اقدامات کر رہے ہیں۔ ان کا کہنا تھا کہ صدر ٹرمپ کے خطاب میں اہم نکات شامل تھے اور انہوں نے پاک بھارت کشیدگی کم کرنے میں نمایاں کردار ادا کیا ہے۔
وزیراعظم نے اپنے عزم کو دہراتے ہوئے کہا کہ پاکستان خطے میں امن و استحکام کے فروغ کے لیے ہر ممکن تعاون جاری رکھے گا اور عالمی برادری کے ساتھ مل کر مسائل کے پائیدار حل کی تلاش میں سرگرم عمل رہے گا۔
