اسلام آباد وزیراعظم شہباز شریف نے کہا ہے کہ صدر ڈونلڈ ٹرمپ امن کے علمبردار ہیں اور ان کی قیادت میں پاک-امریکا تعلقات مزید مضبوط ہوں گے۔
وزیراعظم آفس کے جاری اعلامیے کے مطابق وائٹ ہاؤس میں وزیراعظم اور آرمی چیف فیلڈ مارشل جنرل سید عاصم منیر نے امریکی صدر سے خوشگوار اور دوستانہ ماحول میں ملاقات کی۔
اس ملاقات میں وزیراعظم نے صدر ٹرمپ کی عالمی سطح پر تنازعات کے خاتمے میں مخلصانہ کوششوں کو سراہا اور پاک-بھارت سیزفائر میں ان کے جرات مندانہ اور فیصلہ کن کردار کو قابلِ تحسین قرار دیا، جس سے جنوبی ایشیا میں ایک بڑے سانحے کو ٹالا جا سکا۔
مشرق وسطیٰ کی صورتحال پر گفتگو کرتے ہوئے وزیراعظم نے غزہ میں جنگ بندی کے لیے صدر ٹرمپ کی کوششوں کو سراہا، خصوصاً نیویارک میں مسلم دنیا کے اہم رہنماؤں کے ساتھ جامع مشاورت کی تعریف کی۔
وزیراعظم نے پاک-امریکا ٹیرف معاہدے پر صدر ٹرمپ کا شکریہ ادا کیا اور پاکستان کے زراعت، آئی ٹی، معدنیات اور توانائی کے شعبوں میں امریکی سرمایہ کاری کی دعوت دی۔ خطے کی سلامتی اور انسداد دہشتگردی پر بھی بات چیت ہوئی اور وزیراعظم نے انسداد دہشتگردی میں پاکستان کے کردار کی توثیق پر صدر ٹرمپ کا شکریہ ادا کیا۔
اس موقع پر وزیراعظم نے امریکی صدر کو پاکستان کے سرکاری دورے کی دعوت بھی دی۔
