اسلام آباد: امریکی صدر ڈونلڈ ٹرمپ کی جانب سے غزہ جنگ کے خاتمے کے بیان کے بعد 8 مسلم ممالک کے مشترکہ اعلامیے پر ترجمان دفتر خارجہ کا ردعمل سامنے آ گیا۔
ترجمان کے مطابق پاکستان، اردن، متحدہ عرب امارات، انڈونیشیا، ترکیہ، سعودی عرب، مصر اور قطر کے وزرائے خارجہ نے صدر ٹرمپ کی قیادت اور امن کی کوششوں کا خیرمقدم کیا ہے۔ اعلامیے میں غزہ جنگ بندی، فلسطینیوں کی جبری بے دخلی کی روک تھام اور انسانی امداد کی فراہمی پر زور دیا گیا۔
دفتر خارجہ کا کہنا ہے کہ وزرائے خارجہ نے امریکا کے ساتھ امن کے لیے شراکت داری پر آمادگی ظاہر کی اور خطے میں امن، سلامتی اور استحکام کے عزم کو دہرایا۔
ترجمان کے مطابق اجلاس میں دو ریاستی حل اور آزاد فلسطینی ریاست کے قیام کی بھرپور حمایت کی گئی، ساتھ ہی غزہ کی تعمیر نو اور اسرائیلی انخلا پر زور دیا گیا۔ وزرائے خارجہ نے اس بات پر اتفاق کیا کہ معاہدے پر عملدرآمد یقینی بنانے کے لیے قریبی تعاون جاری رکھا جائے گا۔
