لاہور: پاکستان میں اسموگ: پنجاب بھر کے اسکول بند کردیے گئے
اسموگ اور فضائی آلودگی کے باعث پنجاب پنجاب کے تمام اضلاع میں اسکول بند کردیے گئے ہیں۔
اس حوالے سے جاری ہونے والے نوٹیفکیشن کے مطابق پنجاب بھر میں تمام سرکاری اور نجی اسکول 17 نومبر تک بند رہیں گے۔
وزیرِ تعلیم پنجاب رانا سکندر حیات نے اپنے بیان میں کہا ہے کہ اسموگ کے بڑھتے اثرات کے پیش ِنظر تمام اضلاع میں اسکول بند کر رہے ہیں،
فیصلہ اضلاع کی جانب سے موصول ہونے والی شکایات کی روشنی میں کیا گیا ہے۔
پاکستان میں اسموگ : پنجاب بھر کے اسکول بند کردیے گئے!
رانا سکندر حیات نے کہا ہے کہ تمام سرکاری اور نجی اسکولز 17 نومبر تک بند رکھے جائیں گے۔
انہوں نے کہا ہے کہ تعلیمی نقصان کا احساس ہے مگر تعلیمی ادارے بند کرنے کا اقدام مجبوراً اٹھا رہے ہیں،
بچوں کو مہلک اثرات سے بچانے کے لیے یہ انتہائی فیصلہ کرنا پڑا۔
صوبائی وزیر رانا سکندر حیات نے کہا ہے کہ آن لائن تدریس میں مشکلات کے پیشِ نظر متبادل حکمتِ عملی جلد لا رہے ہیں، عوام بھی شعور کا مظاہرہ کریں، اپنی گاڑیوں کی فٹنس یقینی بنائیں۔
ٹرینوں کی آمد و رفت میں تاخیر
دوسری جانب اسموگ کے باعث ملک کے مختلف شہروں میں ٹرینوں کی آمد و رفت میں تاخیر کی شکایات بھی سامنے آئی ہیں۔
اس معاملے پر سی ای او ریلوے عامر بلوچ نے کہا ہے کہ خراب موسم کے باوجود ٹرین آپریشن جاری ہے، پاکستان ریلویز نے کوئی ٹرین منسوخ نہیں کی۔
عامر بلوچ نے کہا ہے کہ اسموگ زدہ علاقوں میں کم رفتار سے ٹرینیں چلا رہے ہیں۔
