یونان کشتی حادثہ کے بعد ریسکیو کیے جانے والے افراد میں 47 پاکستانی شہری بھی شامل ہیں، ترجمان دفتر خارجہ
ترجمان دفتر خارجہ ممتاز زہرا بلوچ کی جانب سے جاری کردہ بیان میں کہا گیا کہ ابتدائی اطلاعات کے مطابق گزشتہ روز یونان کے جنوبی جزیرے میں کشتی الٹنے کے حادثے کے بعد ریسکیو کیے جانے والوں میں 47 پاکستانی بھی شامل ہیں جبکہ مرنے والوں میں ایک پاکستانی کے شامل ہونے کی تصدیق کی گئی ہے۔
ان کا مزید کہنا ہے کہ اس مرحلے پر ہم مرنے والے یا لاپتا پاکستانی شہریوں کی تعداد کی تصدیق کرنے سے فی الحال قاصر ہیں۔ ایتھنز میں پاکستانی سفارت خانہ براہ راست سرچ اینڈ ریسکیو آپریشن میں حصہ لینے والے متعلقہ کوسٹ گارڈ حکام کے ساتھ رابطہ رکھے ہوئے ہے۔
پاکستانی سفارتخانے کے حکام ریسکیو کیے گئے پاکستانیوں سے ملاقات کرنے اور انہیں ہر ممکن مدد فراہم کرنے کے لیے کریٹ پہنچ گئے ہیں۔ لاپتا پاکستانیوں کے اہل خانہ پاکستانی سفارتخانے سے رابطہ کر کے معلومات حاصل کر سکتے ہیں۔
قبل ازیں وزیراعظم شہباز شریف نے یونان کشتی حادثہ میں پاکستانیوں کے جاں بحق ہونے پر افسوس کا اظہار کرتے ہوئئے کہا تھا کہ انسانی اسمگلر ایک ایسا ظالم مافیا ہے جو کہ غریب عوام کو جھوٹے اور سنہری خواب دکھا کر ان سے پیسے بٹورنے میں مصروف ہے۔
یاد رہے کہ گزشتہ روز یونان کے جنوبی جزیرے گیودوس میں مہاجرین کو لے کر جانے والی لکڑی کی بنی ایک کشتی ڈوبنے سے 5 افراد ہلاک ہو گئے تھے جبکہ ہلاکتوں میں مزید اضافہ کا خدشہ ہے۔
