بانی پاکستان تحریک انصاف عمران خان نے وزیراعلیٰ علی امین گنڈاپور کو پی ٹی آئی خیبر پختونخوا کی صدارت سے ہٹا دیا۔
عمران خان نے خیبرپختونخوا کے وزیراعلیٰ علی امین گنڈاپور سے پارٹی کی صوبائی صدارت کا عہدہ واپس لے کر ان کی جگہ جنید اکبر کو پارٹی کا نیا صوبائی صدر مقرر کر دیا۔
بانی پی ٹی آئی نے پارٹی کے سیکرٹری جنرل سلمان اکرم راجہ کو جنید اکبر کی تقرری کا نوٹیفکیشن جاری کرنے کی ہدایت کر دی۔ اس کے علاوہ انہوں نے سلمان اکرم راجہ کو پنجاب میں پارٹی کی تشکیل نو کے لیے مشاورت کی ہدایت بھی کر دی۔
اس حوالے سے سلمان اکرم راجہ نے میڈیا سے گفتگو کرتے ہوئے کہا کہ علی امین خود بھی چاہتے تھے وہ پارٹی صدارت اپنے پاس نہ رکھیں، بانی پی ٹی آئی نے انہیں کو کہا ہے کہ صوبے میں دہشتگردی اور گورننس کے معاملات پر فوکس کیا جائے۔
ذرائع کا کہنا ہے کہ عمران خان نے کے پی میں کرپشن پر تحفظات کا اظہار کیا ہے اور علی امین کو پیغام دیا ہے کہ وہ ڈیرہ اسماعیل خان کی سیاست سے باہر آئیں۔
یہ بھی واضح رہے کہ تحریک انصاف نے پبلک اکانٹس کمیٹی کے چیئرمین کے لیے شیر افضل کو نامزد کیا تھا لیکن گزشتہ دنوں ان کی نامزدگی منسوخ کر کے جنید اکبر کو اس عہدے کے لیے نامزد کیا گیا جو بلا مقابلہ پبلک اکانٹس کمیٹی کے چیئرمین منتخب ہو چکے ہیں۔
