کراچی سمیت ملک بھر کے صارفین کے لئے سہ ماہی ایڈجسٹمنٹ کی مد میں مارچ کے مہینے سے بجلی سستی ہونے کا امکان ہے۔
کیپسٹی چارجز کی مد میں زبردستی کمی کے باعث بجلی صارفین کو ریلیف ملنے کی راہ ہموار ہو گئی ہے جبکہ بجلی کی تقسیم کار کمپنیوں نے ایڈجسٹمنٹ کی درخواست نیپرا کو جمع کروا دی ہے۔
نیپرا کی طرف سے جمع کروائی گئی درخواست کے تحت مالی سال 25-2024 کی دوسری سہ ماہی کے لئے بجلی کی قیمت میں 2 روپے فی یونٹ کمی متوقع ہے۔
نیپرا کی طرف سے جمع کروائی گئی درخواست کی منظوری کی صورت میں مارچ 2025 سے بجلی کی قیمتوں میں کمی ہو گی جس سے عوام کو 52 ارب روپے سے زائد کا ریلیف مل سکتا ہے۔
نیشنل الیکٹرک پاور ریگولیٹری اتھارٹی ( نیپرا ) کی طرف سے 12فروری 2025 کو درخواستوں پر عوامی سماعت کی جائے گی۔
ذرائع کے مطابق بجلی کی قیمتوں میں کمی مارچ، اپریل اور مئی کے مہینوں میں نرخوں پر اثر انداز ہو گی، کے الیکٹرک صارفین پر بھی سہ ماہی ایڈجسٹمنٹ لاگو ہو گی جبکہ لائف لائن صارفین کو ریلیف نہیں دیا جائے گا۔
یاد رہے کہ کراچی کے سوا ملک کے باقی ماندہ صارفین کیلئے نیپرا ماہانہ ایڈجسٹمنٹ میں مسلسل 5 بار بجلی سستی کر چکا ہے اور چھٹی بار بجلی کی قیمت میں کمی کرنے کی درخواست پر نیپرا کا فیصلہ ابھی آنا باقی ہے۔
