پی ٹی آئی کے رہنما شیخ وقاص اکرم نے تحریک انصاف میں مائنس ون فارمولا کامیاب بنانے کے حوالے سے اہم انکشاف کیا ہے۔
پی ٹی آئی کے مرکزی سیکرٹری اطلاعات شیخ وقاص اکرم نے اپنے ایک بیان میں کہا ہے کہ چیف الیکشن کمشنر کی جنوری میں مدت ملازمت ختم ہو گئی۔ وزیر اعظم نے چیف الیکشن کمشنر کی تعیناتی کے معاملے پر پارلیمانی کمیٹی بنانی ہے۔
ان کا کہنا تھا کہ چیف الیکشن کمیشن کا کردار متنازع اور مایوس کن رہا ہے۔ ان کے ہوتے ہوئے غیر آئینی اقدامات ہوئے۔ اعلیٰ عدلیہ نے بار بار چیف الیکشن کمشنر کے فیصلوں پر اعتراض اٹھایا۔ تاریخ میں ایسا کردار کسی چیف الیکشن کمشنر کا نہیں رہا ہے۔
شیخ وقاص اکرم نے مزید کہا کہ مائنس ون فارمولا کامیاب بنانے میں چیف الیکشن کمشنر کا کردار کلیدی رہا۔ فارم 47 کے پلان میں چیف الیکشن کمشنر سہولت کار رہے ہیں۔
پی ٹی آئی نے چیف الیکشن کمشنر کے خلاف عمر ایوب کے ذریعے سپریم جوڈیشل کونسل میں شکایت (درخواست) جمع کروا دی ہے۔
ترجمان پی ٹی آئی شیخ وقاص اکرم کا اس حوالے سے مزید کہنا تھا کہ الیکشن کمیشن نے بانی پی ٹی آئی کے خلاف بطور پراسیکیوٹر کا کردار ادا کیا۔
