پنجاب پاکستان کا زرعی پاور ہائوس بن گیا ہے، ملک کی معاشی ترقی کے عمل میں بھرپور حمایت جاری رکھیں گے، جنرل سید عاصم منیر
آرمی چیف اور اعلیٰ حکومتی عہدیداران نے ایس آئی ایف سی کے گرین کارپوریٹ انیشی ایٹو کا دورہ کیا ، آرمی چیف اور وزیر اعلیٰ پنجاب مریم نواز کے ساتھ دیگر وفاقی و صوبائی وزرا اور زرعی شعبے سے متعلق افسران بھی موجود تھے۔
آرمی چیف جنرل عاصم منیر اور وزیراعلیٰ پنجاب مریم نواز نے “سمارٹ ایگری فارم”، “گرین ایگری مالز” اور “ایگری ریسرچ سہولت سنٹر” کا باقاعدہ افتتاح کیا، دورے کے دوران شرکا کو زرعی شعبے کی ترقی کے لیے استعمال ہونے والی جدید زرعی مشینری کا معائنہ بھی کرایا گیا۔
اس منصوبے کے تحت کسانوں کو مہنگی مشینری خریدنے کی بجائے آسان کرائے پر مشینری حاصل کرنے کے مواقع میسر ہوں گے ، جدید آبپاشی کے نظام کے لیے پنجاب بھر میں 25 “گرین ایگری مال” تیار کیے گئے ہیں، سال کے اختتام تک ملک بھر میں 250 “گرین ایگری مال” کی تکمیل ہو جائے گی۔
پنجاب حکومت کے اس منصوبے کے تحت پانچ ہزار ایکڑ پر مشتمل جدید زرعی فارم کا بھی آغاز ہو گیا، گرین ایگری مال اینڈ سروس کمپنی کسانوں کو ان کے گھر کی دہلیز پر معیاری بیج، کھاد، کیڑے مار ادویات رعایتی قیمت پر فراہم کرے گی ،کسانوں کو ڈرونز سمیت زرعی مشینری رعایتی کرائے پر مل سکے گی۔
اس موقع پر آرمی چیف جنرل سید عاصم منیر نے خطاب کرتے ہوئے کہا پنجاب پاکستان کا زرعی پاور ہائوس بن گیا، جدید زراعت میں صوبہ پنجاب اور یہاں کے کسانوں کا قائدانہ کردار قابل تحسین ہے، گرین کارپوریٹ منصوبے کے تحت مختصر وقت میں کامیابیاں حوصلہ افزا اور ترقی کی نوید ہیں، پاک فوج ملک کی معاشی ترقی کے عمل میں بھرپور حمایت جاری رکھے گی۔
اس موقع پر وزیراعلیٰ پنجاب مریم نواز نے کہا کہ چولستان اورپنجاب میں جدید زراعت کے انقلاب کی بنیاد رکھ دی ،کسانوں کی ترقی کے ایک نئے سفر کا آغاز ہے، زراعت کی ترقی کسان کی ترقی اور پاکستان کی خوش حالی کی ضمانت ہے۔
