نئی دہلی: بھارت میں ڈاکٹروں نے ایک نایاب طبی کیس میں 17 سالہ نوجوان کی کامیاب سرجری کی ہے، جو پیدائشی طور پر چار ٹانگوں کے ساتھ پیدا ہوا تھا۔
آل انڈیا انسٹی ٹیوٹ آف میڈیکل سائنسز (AIIMS) کے ماہرین نے اس نوجوان کی دو اضافی ٹانگیں، جو اس کے پیٹ سے جڑی ہوئی تھیں، کو کامیابی سے علیحدہ کر دیا، جس سے اس کی زندگی میں ایک نیا باب کھل گیا۔
بھارتی میڈیا کے مطابق، نوجوان کا تعلق اتر پردیش کے ضلع بالیا سے ہے اور وہ 28 جنوری کو AIIMS لایا گیا تھا۔ اضافی ٹانگوں کی وجہ سے اس کی جسمانی نشوونما متاثر ہو رہی تھی اور وہ دیگر اعضاء کو نقصان پہنچا سکتی تھیں۔
نوجوان نے آٹھویں جماعت تک پہنچنے پر تعلیم چھوڑ دی کیونکہ نہ صرف جسمانی مسائل اس کی راہ میں رکاوٹ بن رہے تھے بلکہ لوگ اس کا مذاق بھی اڑاتے تھے، جس سے اس کی ذہنی صحت بھی متاثر ہوئی۔
سرجری کرنے والے ماہر ڈاکٹر کرشنا کے مطابق، اس قسم کے کیسز کو طبی زبان میں “نامکمل پیراسائٹک جڑواں” (Incomplete Parasitic Twin) کہا جاتا ہے۔
یہ AIIMS نئی دہلی میں اپنی نوعیت کا پہلا کیس تھا، اور ڈاکٹروں کی محنت و مہارت کی بدولت نوجوان کو ایک بہتر زندگی کا موقع ملا۔ سرجری کے بعد اس کی صحت میں نمایاں بہتری آئی ہے، اور اب وہ ایک عام زندگی گزارنے کی امید رکھتا ہے۔
