لاہور۔پنجاب اسمبلی کی پبلک اکاؤنٹس کمیٹی تھری نے تحریک انصاف کے دور حکومت میں سامنے آنے والی مالی بے ضابطگیوں کی تحقیقات کے لیے اہم اقدام اٹھایا ہے۔ 2019 میں رپورٹ ہونے والی مالی بدعنوانی کے تحت 18 کیسز تحقیقات کے لیے ڈی جی اینٹی کرپشن کو ارسال کر دیے گئے ہیں۔
ذرائع کے مطابق، ڈسٹرکٹ ہیلتھ اتھارٹی ڈی جی خان اور ڈسٹرکٹ ہیلتھ اتھارٹی فیصل آباد میں مالی بے ضابطگیوں کی مکمل چھان بین کا آغاز کر دیا گیا ہے۔ اس سلسلے میں پبلک اکاؤنٹس کمیٹی تھری نے وزیرِاعلیٰ معائنہ ٹیم کی معاونت بھی حاصل کر لی ہے، جبکہ محکمہ صحت سمیت دیگر متعلقہ اداروں سے ضروری ریکارڈ طلب کر لیا گیا ہے۔
کمیٹی نے واضح کیا ہے کہ جو افسران ریکارڈ فراہم کرنے میں کوتاہی برتیں گے، ان کے خلاف سخت کارروائی کی جائے گی۔
اب تک، پبلک اکاؤنٹس کمیٹی تھری مختلف محکموں سے ڈیڑھ ارب روپے کی وصولی کر چکی ہے، جبکہ مزید تحقیقات جاری ہیں۔
