اسلام آباد ۔ٹرمپ انتظامیہ نے مختلف ممالک پر سفری پابندیاں عائد کرنے کی تیاریاں شروع کر دی ہیں جس میں پاکستان سمیت دیگر اہم ممالک بھی شامل ہیں۔
امریکی میڈیا کے مطابق، ٹرمپ انتظامیہ 43 ممالک کے شہریوں پر سفری پابندیاں عائد کرنے کے لیے غور کر رہی ہے۔ ان نئی پابندیوں کے تحت ممالک کو تین مختلف گروپوں میں تقسیم کیا جائے گا۔ پہلے گروپ کو “ریڈ گروپ” کا نام دیا گیا ہے جس میں افغانستان، بھوٹان، کیوبا، ایران، شمالی کوریا سمیت 11 ممالک شامل ہیں۔
دوسری فہرست، جسے “اورنج لسٹ” کہا جائے گا، میں پاکستان اور روس سمیت 10 ممالک شامل ہیں۔ تیسرے گروپ کو “یلو لسٹ” کا نام دیا گیا ہے جس میں 20 ممالک شامل ہیں۔ ریڈ لسٹ میں شامل ممالک کے شہریوں پر مکمل سفری پابندیاں عائد کی جائیں گی۔ اورنج لسٹ میں شامل ممالک کے شہریوں کے لیے امیگرنٹ اور سیاحتی ویزے محدود کیے جائیں گے، جبکہ کاروباری مسافروں کو کچھ شرائط کے ساتھ امریکا میں داخلے کی اجازت دی جا سکتی ہے۔
ریڈ لسٹ میں شامل کیے جانے والے ممالک میں افغانستان، بھوٹان، کیوبا، ایران، لیبیا، شمالی کوریا، شام، سوڈان، سومالیہ، وینزویلا اور یمن شامل ہو سکتے ہیں۔ یلو لسٹ میں چاڈ، ڈومینیکا، اور لائبیریا سمیت 20 ممالک پر غور کیا جا رہا ہے۔ ان ممالک کے شہریوں کو ویزا درخواست کے حوالے سے کسی بھی تحفظات کو دور کرنے کے لیے 60 دن کا وقت دیا جائے گا۔
یاد رہے کہ ٹرمپ نے اپنے پہلے دور صدارت میں بھی متعدد مسلم ممالک کے شہریوں پر امریکا میں داخلے پر پابندی لگانے کے لیے تین ایگزیکٹو آرڈرز پر دستخط کیے تھے، جنہیں “مسلم بین” کے طور پر جانا جاتا ہے۔ ایک امریکی عہدیدار نے نام ظاہر نہ کرنے کی شرط پر بتایا کہ سفری پابندیوں کی فہرست میں رد و بدل بھی ممکن ہے۔
