اسلام آباد ۔ایک حالیہ تحقیق سے معلوم ہوا ہے کہ وہ افراد جو روزانہ چینی سے بھرپور سافٹ ڈرنکس یا دیگر میٹھے مشروبات استعمال کرتے ہیں، ان میں منہ کے کینسر کا خطرہ ان لوگوں کے مقابلے میں پانچ گنا زیادہ ہوتا ہے جو ان مشروبات سے پرہیز کرتے ہیں۔
یونیورسٹی آف واشنگٹن کی تحقیق کے مطابق منہ کے کینسر کے کیسز میں خطرناک حد تک اضافہ ہو رہا ہے، خاص طور پر ان افراد میں جو نہ سگریٹ نوشی کرتے ہیں اور نہ ہی شراب پیتے ہیں۔ یہ مریض کسی واضح خطرے والے عوامل کے بغیر بھی اس بیماری کا شکار ہو رہے ہیں۔
ماہرین نے اس تشویشناک اضافے کے پیچھے خوراک کو ایک اہم عنصر قرار دیا ہے۔
روایتی طور پر، منہ کے کینسر کو زیادہ تر تمباکو نوشی، شراب نوشی، اور سپاری چبانے جیسے عوامل سے جوڑا جاتا تھا، اور یہ بیماری عام طور پر ایسے مردوں میں پائی جاتی تھی جو ان خطرناک عادات میں مبتلا تھے۔
تاہم، یونیورسٹی آف واشنگٹن کی تحقیق نے انکشاف کیا ہے کہ زیادہ میٹھے مشروبات کا استعمال بھی منہ کے کینسر کے امکانات میں نمایاں اضافہ کر سکتا ہے، چاہے فرد تمباکو یا شراب کا استعمال کرتا ہو یا نہیں۔
یہ تحقیق خوراک اور طرز زندگی کے عوامل پر مزید تحقیق کی ضرورت کو اجاگر کرتی ہے تاکہ اس خطرناک بیماری سے بچاؤ کے لیے موثر اقدامات کیے جا سکیں۔
