اسلام آباد ۔وزیراعظم شہبازشریف کی مشاورت پر اسپیکر قومی اسمبلی ایاز صادق نے قومی سلامتی کی پارلیمانی کمیٹی کا اجلاس منگل کی دوپہر ڈیڑھ بجے طلب کر لیا ہے۔
وزیراعظم کے دفتر سے جاری ایک بیان میں کہا گیا کہ یہ اجلاس ان کیمرہ منعقد کیا جائے گا، جس میں سیکیورٹی کی موجودہ صورتحال پر تفصیلی بریفنگ دی جائے گی۔
بیان میں مزید کہا گیا کہ اس اجلاس میں عسکری قیادت پارلیمانی کمیٹی کو ملک کی سیکیورٹی صورت حال سے آگاہ کرے گی۔
یہ اجلاس قومی اسمبلی ہال میں ہوگا، جس میں پارلیمان کی تمام سیاسی جماعتوں کے پارلیمانی رہنما اور ان کے نامزد نمائندے شرکت کریں گے، جبکہ کابینہ کے متعلقہ ارکان بھی اس میں شامل ہوں گے۔
بیان میں بتایا گیا کہ ان کیمرا اجلاس میں موجودہ قومی سلامتی کی صورتحال پر تفصیلی بریفنگ دی جائے گی اور تمام سیاسی جماعتوں کی مشاورت سے ایک مشترکہ پالیسی تیار کی جائے گی۔
