لندن۔ایک حالیہ تحقیق میں یہ بات سامنے آئی ہے کہ دل کی بیماری میں مبتلا موٹے افراد میں وزن میں شدید اتار چڑھاؤ موت کے خطرے کو نمایاں طور پر بڑھا دیتا ہے۔
یہ تحقیق انجلیا رسکن یونیورسٹی کی جانب سے کی گئی تھی، جس میں یوکے بائیو بینک کے مطالعے کا حصہ بننے والے 8,297 شرکاء کے ڈیٹا کا تجزیہ کیا گیا۔ ان شرکاء کا تقریباً 14 سال تک مطالعہ کیا گیا، جس دوران وزن میں کمی اور اضافے دونوں سے موت کے خطرے میں اضافہ دیکھا گیا۔
اس تحقیق کے سرکردہ مصنف ڈاکٹر جوفن ژانگ نے کہا کہ ڈاکٹروں کو ان نتائج کو ذہن میں رکھتے ہوئے علاج کرنا چاہیے، خاص طور پر اس دور میں جب مارکیٹ میں تیزی سے وزن کم کرنے کے لیے مختلف ادویات دستیاب ہیں۔
انہوں نے یہ بھی کہا کہ یہ تحقیق اپنی نوعیت کا پہلا مطالعہ ہے جس میں دل کی بیماری میں مبتلا موٹے افراد میں وزن میں تبدیلی اور اموات کے درمیان تعلق کا جائزہ لیا گیا ہے۔
