اسلام آباد ۔ قومی سلامتی کی پارلیمانی کمیٹی کا بند کمرہ اجلاس پارلیمنٹ ہاؤس میں جاری ہے، جس کے دوران سیکیورٹی کے سخت انتظامات کیے گئے ہیں۔
وزیرِاعظم شہباز شریف نے اجلاس سے خطاب کرتے ہوئے کہا کہ دہشت گردی ملک کے لیے ایک ناسور بن چکی ہے، اور ہمیں مل کر اس کا مستقل اور مؤثر حل نکالنا ہوگا۔ ان کا کہنا تھا کہ پاکستان کی سرزمین پر دہشت گردی کے لیے کوئی جگہ نہیں ہے، اور حکومت ملک کو اس لعنت سے مکمل طور پر پاک کرنے کے لیے پرعزم ہے۔
انہوں نے شہداء کی قربانیوں کو خراجِ تحسین پیش کرتے ہوئے کہا کہ ہم ان قربانیوں کو کسی صورت فراموش نہیں کر سکتے اور ملک میں امن و استحکام یقینی بنایا جائے گا۔
وزیرِاعظم نے اس عزم کا اظہار کیا کہ پوری قوم دہشت گردی کے خلاف جنگ میں متحد ہے اور اس فتنے کو ہر حال میں شکست دی جائے گی۔ انہوں نے یہ بھی کہا کہ اگر اپوزیشن کے اراکین اس اہم اجلاس میں شرکت کرتے تو یہ قومی مفاد میں بہتر ہوتا۔
مزید برآں، وزیرِاعظم نے دہشت گردی کے خلاف جاری ریاستی کارروائیوں کو قابلِ ستائش قرار دیا اور ملک کے تحفظ کے لیے اپنی جانوں کا نذرانہ پیش کرنے والوں کو قوم کی طرف سے سلام پیش کیا۔
اسپیکر قومی اسمبلی سردار ایاز صادق کی زیرِ صدارت ہونے والے اس اجلاس میں اعلیٰ حکومتی اور عسکری قیادت شریک ہوئی۔ اجلاس میں آرمی چیف جنرل عاصم منیر، ڈی جی آئی ایس آئی عاصم ملک، ڈی جی ایم او، اور ڈی جی آئی بی فواد اسد بھی موجود تھے۔
دیگر نمایاں شرکاء میں وزیرِاعظم شہباز شریف، بلاول بھٹو زرداری، مولانا فضل الرحمٰن، وزیرِ دفاع خواجہ آصف، رانا ثناء اللہ، وزیرِ خزانہ محمد اورنگزیب، احسن اقبال، چیئرمین سینیٹ یوسف رضا گیلانی، فیصل واوڈا، خالد مقبول صدیقی، جام کمال، وزیرِاعظم آزاد کشمیر اور وزیرِاعلیٰ گلگت بلتستان شامل تھے۔
