اسلام آباد۔اسلام آباد ہائی کورٹ نے چیف الیکشن کمشنر اور دو الیکشن کمیشن ممبران کی تقرری میں تاخیر کے خلاف قومی اسمبلی اور سینیٹ کے اپوزیشن رہنماؤں کی درخواست پر وفاق، وزیر اعظم (پرنسپل سیکریٹری کے ذریعے) اور صدر (سیکریٹری کے ذریعے) کو پیشگی نوٹس جاری کر دیے۔
جسٹس محمد اعظم خان نے قومی اسمبلی اور سینیٹ میں اپوزیشن لیڈرز، عمر ایوب اور شبلی فراز کی دائر کردہ درخواست پر سماعت کی۔
عدالت نے چیف الیکشن کمشنر اور الیکشن کمیشن کے ارکان کو بھی پیشگی نوٹس جاری کر دیے۔
درخواست گزاروں کی طرف سے وکیل سمیر کھوسہ عدالت میں پیش ہوئے اور موقف اختیار کیا کہ چیف الیکشن کمشنر اور الیکشن کمیشن کے ممبران کی مدت مکمل ہونے کے باوجود وہ بدستور فرائض انجام دے رہے ہیں۔
عدالت نے دریافت کیا کہ کیا چیف الیکشن کمشنر اور الیکشن کمیشن کے ارکان کی تعیناتی کا عمل شروع ہو چکا ہے؟ وکیل سمیر کھوسہ نے جواب دیا کہ اب تک اس عمل کا آغاز نہیں ہوا اور پارلیمانی کمیٹی کی تشکیل بھی باقی ہے۔
ہائی کورٹ نے وفاق، وزیر اعظم (پرنسپل سیکریٹری کے ذریعے)، صدر (سیکریٹری کے ذریعے)، چیف الیکشن کمشنر اور الیکشن کمیشن کے ارکان کو پیشگی نوٹس جاری کرتے ہوئے کیس کی سماعت 29 اپریل تک ملتوی کر دی۔
