اسلام آباد ۔بین الاقوامی مالیاتی ادارے (آئی ایم ایف) نے بجلی کے نرخوں میں کمی کی منظوری دے دی۔
ذرائع کے مطابق آئی ایم ایف نے بجلی کے نرخ میں فی یونٹ ایک روپے کمی کی اجازت دے دی ہے، جس سے تمام صارفین کو بجلی کے بلوں میں ایک روپے فی یونٹ کا ریلیف ملے گا۔
یہ سہولت کیپٹیو پاور پلانٹس پر عائد لیوی سے حاصل ہونے والی آمدنی کے ذریعے فراہم کی جائے گی، جبکہ کیپٹیو پاور پلانٹس کے لیے گیس کے استعمال پر لیوی نافذ کی گئی ہے۔
حکومت بجلی صارفین کے لیے مزید ریلیف پیکیج پر بھی کام کر رہی ہے، جس کا اعلان آئی ایم ایف کی منظوری کے بعد کیا جائے گا۔
یاد رہے کہ پاکستان اور آئی ایم ایف کے درمیان اسٹاف لیول معاہدہ طے پایا تھا، جس کے نتیجے میں پاکستان کو ایکسٹینڈڈ فنڈ فیسلیٹی (ای ایف ایف) کے تحت ایک ارب ڈالر تک رسائی حاصل ہو چکی ہے۔
آئی ایم ایف نے اپنے بیان میں کہا تھا کہ پاکستان میں مہنگائی کی شرح 2015 کے بعد سے کم ترین سطح پر آ چکی ہے، معیشت میں بہتری آئی ہے اور مزید استحکام کی توقع کی جا رہی ہے۔
اس پروگرام کے تحت پاکستان کو مجموعی طور پر 2 ارب ڈالر کی رقم دستیاب ہوگی۔
