راولپنڈی ۔چیف آف آرمی اسٹاف جنرل عاصم منیر سے امریکہ کے اعلیٰ سطحی وفد نے ملاقات کی، جس میں انہوں نے پاکستان کی معدنی ترقی میں شراکت داری میں دلچسپی ظاہر کی اور پاکستان کی پالیسی پر اعتماد کا اظہار کیا۔
پاک فوج کے شعبہ تعلقات عامہ (آئی ایس پی آر) کی جانب سے جاری کیے گئے بیان کے مطابق، یہ ملاقات جنرل ہیڈکوارٹرز (جی ایچ کیو) میں ہوئی، جس میں امریکا کے جنوبی اور وسطی ایشیائی امور کے بیورو کے سینئر افسر ایرک میئر کی قیادت میں اعلیٰ امریکی وفد نے شرکت کی۔
بیان میں کہا گیا کہ ملاقات پاکستان منرل انوسٹمنٹ فورم کے انعقاد کے موقع پر ہوئی، جس پر وفد نے اس منفرد فورم کے انعقاد کو سراہا اور پاکستان کی معدنی پالیسی پر باہمی فائدے کی بنیاد پر اعتماد کا اظہار کیا۔
امریکی وفد کے سربراہ ایرک میئر نے امریکی حکومت کی ترجیحات پر گفتگو کرتے ہوئے کہا کہ پاکستان کے ساتھ معدنی ترقی میں تعاون دونوں ملکوں کے مشترکہ مفاد میں ہے اور انہوں نے پاکستان میں سرمایہ کاری کے ماحول میں بتدریج بہتری پر اپنی دلچسپی کا بھی اظہار کیا۔
آئی ایس پی آر کے مطابق، اس ملاقات نے دونوں فریقوں کو عالمی سطح پر پیش آنے والی تبدیلیوں اور پاکستان کی علاقائی سیکیورٹی کے مقاصد پر اپنے خیالات کا تبادلہ کرنے کا موقع فراہم کیا۔
دونوں فریقین نے باہمی تعلقات کی مثبت پیش رفت پر اطمینان کا اظہار کیا اور مزید پہلوؤں کو شامل کرنے اور تعلقات کو مزید مستحکم بنانے کے لیے جی ٹو جی اور پی ٹو پی تعاون میں اضافے کی ضرورت پر اتفاق کیا۔
