راولپنڈی ۔آرمی چیف جنرل سید عاصم منیر نے کہا ہے کہ وطن کے لیے قربانی دینے والے شہدا اور غازی قوم کا فخر ہیں، اور ملک میں آزادی اور امن انہی جانبازوں کی قربانیوں کا ثمر ہے۔
راولپنڈی میں جنرل ہیڈکوارٹرز (جی ایچ کیو) میں ایک پروقار تقریب کا انعقاد کیا گیا، جس میں مختلف آپریشنز کے دوران بہادری کا مظاہرہ کرنے والے افسروں اور جوانوں کو فوجی اعزازات سے نوازا گیا۔ اس موقع پر آرمی چیف جنرل عاصم منیر نے خود اعزازات تقسیم کیے۔
پاک فوج کے شعبہ تعلقات عامہ (آئی ایس پی آر) کے مطابق، تقریب میں سینئر فوجی حکام، اعزاز حاصل کرنے والے افسران، جوانوں اور ان کے اہل خانہ نے شرکت کی۔ نمایاں کارکردگی دکھانے والے افسران اور جوانوں کو ستارہ امتیاز (ملٹری) اور تمغۂ بسالت سے نوازا گیا، جب کہ شہدا کو ملنے والے اعزازات ان کے اہلِ خانہ نے وصول کیے۔
تقریب سے خطاب کرتے ہوئے آرمی چیف نے کہا:“شہدا اور غازی ہماری شناخت اور فخر ہیں۔ آج جو آزادی اور سکون ہمیں حاصل ہے، وہ ہمارے ان سپوتوں کی بے مثال قربانیوں کا نتیجہ ہے۔ شہدا کے اہلخانہ کی استقامت اور حوصلہ بھی خراج تحسین کے لائق ہے۔”
انہوں نے یہ بھی کہا کہ دہشتگردی کے خلاف جاری جدوجہد میں پاک فوج اور قانون نافذ کرنے والے اداروں نے لازوال قربانیاں دی ہیں۔ ان کی انتھک محنت، قربانی اور غیر متزلزل عزم کی بدولت ملک میں دہشتگردی کی کئی کوششیں ناکام بنائی گئیں۔
تقریب نے ایک بار پھر اس حقیقت کو اجاگر کیا کہ وطن کے محافظ، اپنی جانوں کا نذرانہ دے کر قوم کے لیے امن اور تحفظ کو یقینی بناتے ہیں۔
