اسلام آباد ۔وزیراعظم شہباز شریف نے کہا کہ بلوچستان پاکستان کا ایک اہم صوبہ ہے اور وہاں کے عوام کے لیے جو منصوبے شروع کیے جا رہے ہیں، وہ ان کے دل کی آواز ہیں۔ وہ خونی ٹریک جو ہزاروں جانوں کا نقصان کا سبب بن چکا تھا، اب ہائی وے میں تبدیل کیا جا رہا ہے، اور این ایف سی ایوارڈ میں بلوچستان کا حصہ بھی دگنا کر دیا گیا ہے۔
اسلام آباد میں جناح اسکوائر مری روڈ انڈر پاس منصوبے کی سنگ بنیاد کی تقریب سے خطاب کرتے ہوئے وزیراعظم نے اسلام آباد میں جاری ترقیاتی منصوبوں کو خوش آئند قرار دیا۔ ان کا کہنا تھا کہ اسلام آباد اب ترقی، خوبصورتی اور سہولت کا مرکز بننے جا رہا ہے۔ شہر میں توسیع اور تزئین کے بڑے منصوبے چل رہے ہیں، اور ٹریفک کے بہاؤ میں واضح بہتری آئی ہے۔ شہر کے ہر حصے میں پھولوں کی بہار اس کی خوبصورتی کو مزید بڑھا رہی ہے۔
انہوں نے وفاقی وزیر داخلہ محسن نقوی کی کارکردگی کو سراہا اور کہا کہ اسلام آباد کی بہتری کے لیے جو اقدامات کیے جا رہے ہیں، وہ قابلِ تحسین ہیں۔ یہ نہ صرف شہباز اسپیڈ ہے، نہ ہی محسن نقوی اسپیڈ، بلکہ یہ پاکستان اسپیڈ ہے۔
وزیراعظم نے کہا کہ قومی کوششوں کے نتیجے میں اللہ تعالیٰ نے پاکستان کی درجہ بندی کو بہتر بنایا ہے اور انٹرنیشنل ایجنسی فِچ نے پاکستان کا آؤٹ لک ٹرپل سی سے بی مائنس میں تبدیل کر دیا ہے اور اس کو مستحکم قرار دیا ہے۔
انہوں نے مزید کہا کہ یہ ایک مشترکہ محنت کا نتیجہ ہے، جس سے پاکستان کی معیشت کو استحکام ملا ہے اور اب ہم ان شاء اللہ ترقی اور خوشحالی کی راہ پر گامزن ہوں گے۔ جس طرح پورے اعتماد، طاقت اور عزم کے ساتھ پاکستان کی ٹیم نے مشکلات کا مقابلہ کیا، اسی جذبے کے ساتھ ترقی کے سفر کو بھی آگے بڑھائیں گے۔
وزیر داخلہ محسن نقوی نے تقریب میں اپنے خطاب میں کہا کہ ہم اس منصوبے کو مقررہ وقت سے پہلے مکمل کرنے کا عزم رکھتے ہیں اور وزیراعظم سے انڈر پاس کا افتتاح 60 دن کے بجائے 35 دن بعد کروائیں گے۔ اسلام آباد کے فیصل مسجد چوک پر ٹریفک کے مسائل کے حل کے لیے بھی کام شروع کر دیا گیا ہے، اور بلیو ایریا کے پارکنگ پلازہ کو بھی فعال کیا جا رہا ہے۔
