اسلام آباد ۔پاکستان نے ایک بار پھر چینی بینکوں کے ساتھ قرضوں کی ری شیڈولنگ کا معاملہ اٹھانے کا فیصلہ کیا ہے، اور امید کی جارہی ہے کہ وزیر خزانہ محمد اورنگزیب اگلے ہفتے واشنگٹن میں ہونے والے آئی ایم ایف اجلاس کے دوران اپنے چینی ہم منصب سے اس مسئلے پر بات کریں گے۔
حکومتی ذرائع کے مطابق، وزیر خزانہ آئی ایم ایف کے منیجنگ ڈائریکٹر اور امریکی اسسٹنٹ سیکریٹری برائے خزانہ سے بھی ملاقات کریں گے۔ وزارت خزانہ کے حکام کا کہنا ہے کہ وزیر خزانہ اپنے چھ روزہ دورے کے دوران بدھ کے روز چینی وزیر خزانہ سے ملاقات کریں گے، جس میں وہ 3.4 ارب ڈالر کے قرضوں کو دو سال کے لیے ری شیڈول کرنے کی درخواست کریں گے تاکہ غیر ملکی فنڈنگ کے خلا کو پورا کیا جا سکے۔ وزیر خزانہ کے ہمراہ اس دورے پر سیکریٹری خزانہ، گورنر اسٹیٹ بینک اور سیکریٹری اکنامک افیئرز بھی امریکا روانہ ہوں گے۔
یاد رہے کہ چینی بینکوں سے قرضوں کی ری شیڈولنگ کے لیے نائب وزیراعظم اسحاق ڈار نے اپنے دورہ بیجنگ کے دوران چینی حکام سے درخواست کی تھی، مگر اس میں کوئی پیشرفت نہیں ہو سکی۔
مزید برآں، آئی ایم ایف کے سالانہ اجلاس کے دوران وزیر خزانہ کی سعودی وزیر خزانہ محمد الجدعان سے بھی ملاقات طے ہے۔ اس دوران پاکستانی وفد امریکی وزارت خزانہ کے اعلیٰ حکام سے بھی ملاقات کرے گا۔ حکومتی ذرائع کے مطابق، وزیر خزانہ کی امریکا کے ایگزم بینک کے چیئرپرسن سے بھی ملاقات متوقع ہے۔
واضح رہے کہ امریکی ایگزم بینک ریکوڈیک منصوبے کے لیے 1 ارب ڈالر کا قرض بڑھانا چاہتا تھا اور اس نے ترجیحی قرض دہندہ کا درجہ حاصل کرنے کے لیے حکومت پاکستان سے درخواست بھی کی تھی، تاہم اسلام آباد نے اس پر اتفاق نہیں کیا۔
حکام نے بتایا کہ وزیر خزانہ امریکا کی انٹرنیشنل ڈیولپمنٹ فنانس کارپوریشن کے ساتھ بھی بات چیت کر سکتے ہیں تاکہ جاری نجکاری پروگرام میں تعاون حاصل کیا جا سکے۔ وزیر خزانہ کی آئی ایم ایف کی منیجنگ ڈائریکٹر کرسٹالینا جارجیوا اور دیگر اعلیٰ حکام سے ملاقات بھی متوقع ہے۔
محمد اورنگزیب پاکستان کی طرف سے درمیانی مدت میں ریونیو موبلائزیشن کے موضوع پر پینل ڈسکشن میں بھی شرکت کریں گے، جو آئی ایم ایف کی جانب سے منعقد کیا جائے گا۔
وزیر خزانہ ایشیائی ترقیاتی بینک کے صدر مساتو کانڈا اور ورلڈ بینک گروپ کے صدر اجے بنگا سے بھی ملاقات کریں گے، جبکہ ورلڈ بینک ایشیا ریجن کے نائب صدر مارٹن ریزر سے ملاقات بھی ان کے شیڈول کا حصہ ہے۔ اس کے علاوہ وہ سیکریٹری جنرل کلائمیٹ ویلنریبل فورم محمد نشید سے بھی ملاقات کریں گے۔
