شاید آپ کو جان کر حیرت ہو کہ کیلے کے چھلکوں میں صحت بخش خوبیوں کے ساتھ ساتھ کئی دوسرے شاندار فوائد بھی پوشیدہ ہیں، جن سے اکثر لوگ لاعلم ہوتے ہیں۔
آئیے کیلے کے چھلکوں کے چند دلچسپ فوائد پر نظر ڈالیں:
کیلے کے چھلکے پوٹاشیم، فاسفورس، کیلشیم اور دیگر قیمتی معدنیات سے مالامال ہوتے ہیں۔ اگر انہیں کاٹ کر پودوں کے قریب مٹی میں دفن کر دیا جائے تو یہ ان کی نشوونما کو تیز کرنے میں مددگار ثابت ہوتے ہیں۔
باغیچے میں چھلکوں کے ٹکڑے رکھنے سے نقصان دہ کیڑوں کو دور رکھنے میں مدد ملتی ہے، کیونکہ بعض کیڑے چھلکوں میں موجود قدرتی مرکبات کو ناپسند کرتے ہیں۔
جلد پر کیلے کے چھلکے کو رگڑنے سے مہاسوں میں بہتری آسکتی ہے، کیڑے کے کاٹنے کی خارش کم ہو سکتی ہے اور چہرے کو قدرتی چمک ملتی ہے، کیونکہ چھلکے میں اینٹی آکسیڈنٹس اور وٹامن سی پایا جاتا ہے۔
دانتوں پر چھلکے کے اندرونی حصے کو چند منٹ تک روزانہ رگڑنے سے دانت رفتہ رفتہ سفید ہونے لگتے ہیں۔
کیلے کے چھلکے کو چمڑے کے جوتے، پودوں کے پتے اور چاندی کے برتن چمکانے کے لیے قدرتی پالش کے طور پر بھی استعمال کیا جا سکتا ہے۔
خشک کیلے کے چھلکے آلودہ پانی میں موجود بھاری دھاتوں کو جذب کرنے کی صلاحیت رکھتے ہیں، جو پانی صاف کرنے کا ایک مؤثر اور کم خرچ طریقہ ثابت ہو سکتا ہے۔
کیلے کے چھلکے کو پانی میں ابال کر چائے کی شکل میں پینے سے جسم میں میگنیشیم اور ٹرپٹوفن کی مقدار بڑھتی ہے، جو بہتر نیند اور خوشگوار موڈ میں مدد دیتا ہے۔
